Astanada jastar arasynda ótken III Qysqy jastar oıyndarynda shaıbaly hokkeıden jarys óz máresine jetti. 2004-2005 jyldary týǵan jasóspirimder arasyndaǵy kezdesýler 30 qańtar men 5 aqpan aralyǵynda «Barys» SK-de uıymdastyryldy. Tórt jylda bir ret ótetin baıraqty básekede Shyǵys Qazaqstan, Qaraǵandy, Qostanaı, Almaty jáne Aqmola oblystarynan jáne Astana, Almaty men Aqtóbe qalalarynan 8 komanda sheberlik baıqasty. Elordalyq qurama sapynda №10 sport mektebiniń hokkeıshileri óner kórsetti.
Mádenıet jáne sport basqarmasynan habarlaǵandaı, «Astana» komandasy jarysta úzdik nátıjege qol jetkizip, Jastar oıyndarynyń altyn júldesine ıe boldy. Týrnır ıeleri eshkimge ese jibermeı 21 upaı jınady.
«Jarys jaqsy ótti. Barlyq qarsylastarymyzben birdeı oınadyq. Maqsatymyz – jeńiske jetý boldy! Qysqy jastar oıyndarynda birinshi oryn alý men úshin de, búkil komanda úshin de, bizdiń mektebimiz úshin de asa mańyzdy. Tórt jylda bir ret ótetin jarysta óner kórsetý – úlken qurmet, onyń ústine, birinshi oryn aldyq! Biz klýbtyń atyn shyǵarýǵa tyrystyq, bul oıymyz júzege asty dep oılaımyn», – dedi «Astana» komandasynyń shabýyldaýshysy Bogdan Petrochenko.
Aıta keteıik, III Qysqy jastar oıyndarynyń qorytyndysy boıynsha Shyǵys Qazaqstan oblysynyń komandasy ekinshi oryn alsa, Qaraǵandy oblysynyń hokkeıshileri qola júldeni qanaǵat tutty.
