Túrkistan oblystyq tabıǵı resýrstar jáne tabıǵat paıdalanýdy retteý basqarmasynyń basshysy Ilııas Quramysovtyń málimdeýinshe, zań buzýshylyqtar boıynsha 4,2 mln teńge ákimshilik aıyppul salynǵan. Onyń 4 mln teńgesi, keltirilgen 14 mln teńge zalaldyń 12 mln teńgesi óndirilipti. Janýarlar dúnıesin kúzetý baǵytynda Syrdarııa ózeniniń boıyndaǵy tuqymbaqta jartylaı erkindikke jiberilgen Buqar buǵylarynyń sany byltyr 9 basqa artyp, 155-ke jetken. Olardyń 84-i ishki qorshaýda, 71-i erkindikte júr. Sondaı-aq ótken jyly Búkilálemdik tabıǵat qorymen (WWF) óńirlik parkten 5 bas buǵy Ile-Balqash memlekettik tabıǵı rezervatyna jersindirilgen.
Basqarmanyń usynysymen Otyrar orman sharýashylyǵynyń 66 myń gektar aýmaǵynda ornalasqan Qarataý ormanshylyǵyna tabıǵı-ǵylymı negizdeme jasalǵan. Atalǵan aýmaqta erekshe tabıǵatymyzdy keleshek urpaqqa jetkizý jáne sırek kezdesetin ań-qustardy qorǵaý, kúzetý maqsatynda Turan memlekettik óńirlik tabıǵı parkin ashý josparlanýda. Bul aýmaqty meken etetin Qarataý arqary, tas sýsary, úndi jaırasy sekildi janýarlar da kózdiń qarashyǵyndaı qorǵaýdy qajet etedi.
Ǵalymjan ELShIBAI,
«Egemen Qazaqstan»
Túrkistan oblysy
