J.Qasymbektiń aıtýynsha, Memleket basshysynyń óńiraralyq ınfraqurylymdy júıeli túrde damytý jónindegi tapsyrmasyn oryndaý maqsatynda byltyrdan bastap jergilikti jeli joldaryn jóndeýge bólinetin qarajat tepe-teń negizde 2 ese ulǵaıtylyp, 150 mlrd teńgege deıin jetkizildi. Buǵan deıin elimizde 4 myńnan astam avtojol jóndeldi. 2025 jylǵa qaraı jergilikti joldardyń 85-90% jaqsy jáne qanaǵattanarlyq jaǵdaıda bolady dep kútilýde. Mınıstr keltirgen aqparatqa súıensek, avtokólik joldarynyń normatıvtik qamtylýy men saqtalýyn qamtamasyz etý maqsatynda joldardy aqyly etý júıelerin engizý boıynsha jobalardy júzege asyrý jalǵasýda. Qazirgi tańda jalpy uzyndyǵy 471 km bolatyn Almaty – Qorǵas, Almaty – Qapshaǵaı jáne Astana – Temirtaý jol ýchaskelerinde aqy alý bastaldy. J.Qasymbek aqyly joldardyń quny ózge kórshi eldermen salystyrǵanda áldeqaıda arzan ekenin aıtty.
− Aqyly joldardyń baǵasy qoljetimdi, mysaly, jeńil avtokólikter úshin kılometrine 1 teńgeden. Bul kórshi Qytaı men Reseıdegi aqyly joldardyń baǵasynan áldeneshe arzanǵa túsedi. Eki jyl ishinde taǵy 5,5 myń km jolda aqy tóleý júıesin iske qosý josparlanǵan. Osy qarajat esebinen avtojoldardy saqtaýǵa jumsalatyn shyǵyndar aıtarlyqtaı qysqarady, - dedi mınıstr.
Al byltyr elimizde 1,5 myń km respýblıkalyq mańyzy bar jol jóndelip, 528 km rekonstrýksııalanǵan. Bıyl respýblıkalyq mańyzy bar 4,4 myń km avtojol jóndeýden ótti. Jobalarǵa 100 myńnan astam jol qurylysshylary tartylǵan. Jyldyń sońyna deıin uzyndyǵy 654 km ýchaskede qozǵalys ashylady.
