Babadan qalǵan baǵlan ónerimizdi ulyqtap, osy tórt chempıonatty jyl aralatpaı Shyǵys topyraǵynda ótkizýge uıytqy bolyp júrgen Úrjar aýdarynyń Kókózek aýylynyń týmasy, atbegi, qusbegi, «Shyǵys-Altaı» búrkitshiler federasııasynyń jetekshisi Táttimbet Kápuly ekendigin aıtý paryz.
Tarbaǵataı aýdanynyń ortalyǵy - Aqsýat aýylynda shymyldyǵy túrilgen búrkitshilerdiń 13 chempıonatyna bıyl elimizdiń 12 oblysynan ıtelgisi bar, qarshyǵasy bar, qyrany bar 40 qus qatysyp, jarystyń kórigin qyzdyrdy. Úrjar aýdanynyń seri jigitteri segiz búrkit ákelipti. Osy shara barysynda jergilikti jurt Shoıtaban ataıtyn úrjarlyq ańshy Erzat Baıqadamov segiz búrkittiń birin, ıaǵnı óz qyranyn aqsýattyq azamat Saıat Sadýanovqa syıǵa tartyp, márttigin tanytty. Qusbegiler saıysynyń basy-qasynda júrgen tarbaǵataılyq jigit te qarap qalmaı, saıatshylardyń «tuǵyr jabar» dástúrimen atymtaı jomart azamatqa at mingizip, qurmet kórsetti. «Tarbaǵataı aýdanyna búrkit syılap jatqanymyz – osy óńirde de saıatshylyq óner qanat jaısa, izimizdi jalǵaıtyn inilerimiz kóbeıse degen izgi nıet. Áıtpese ózderińiz biletindeı, bizdiń oblysta Úrjar aýdanynan basqa aýdanda eshkim búrkit ustamaıdy», - deıdi Táttimbet Kápuly.
Eki kúnge sozylǵan chempıonattyń alǵashqy kúninde jurtshylyq qolǵa shaqyrý, shyrǵaǵa túsirý saıystaryn tamashalasa, ekinshi kúni jartylaı fınalǵa joldama alǵan 13 qustyń ónerin qyzyqtady. 13-tiń ishinen fınalǵa tórt qyran sýyrylyp shyǵyp, shapqan attyń sońynda súıretilip bara jatqan túlkiniń tulybyna 20 sekýndtta túsken astanalyq Serikbek Kúntýǵannyń «Alǵyr» atty búrkiti baıqaý jeńimpazy atandy. Úrjarlyq Táttimbet Kápuly men kókshetaýlyq qusbegi Tastanbek Bergenbaı qustaryn qarsaqqa saldy. Bul synda Tarbaǵataı taýynyń shyńynda shyńdalǵan Táttimbettiń «Aq perisi» babynda ekendigin baıqatty.
Búrkitshilerdiń dástúrli chempıonatynyń Tarbaǵataı aýdanynda ótýine «Shyǵys-Altaı» búrkitshiler federasııasymen qatar osy óńirdiń týmasy, mesenat Bádelhan Kámelhanuly men Astanadaǵy L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqovtyń muryndyq bolǵanyn aıta ketken oryndy. Jeńimpazdardy marapattaý sátinde osy azamattardyń syı-sııapaty arnaıy tapsyryldy.
«Qusbegilerdiń chempıonaty Tarbaǵataı aýdanynda alǵash ret uıymdastyryldy. Osy rette Táttimbet, Erzat bastaǵan, Saıat qostaǵan azamattarǵa alǵysymyz zor. Ulttyq dástúrimizge jurttyń qyzyǵýshylyǵy, ynta-yqylasynyń zor ekenin baıqadyq. Sondyqtan aldaǵy jyly osy chempıonatty halyqaralyq deńgeıde, ıaǵnı Yrǵyzbaı Doshanauly atyndaǵy halyqaralyq búrkitshiler saıysy dep ótkizsek pe degen oıymyz bar. Sonymen qatar aýdandaǵy О́ner mektebi ishinen búrkitshiler synybyn ashyp, arnaıy shtat bólýdi josparlap otyrmyz», - deıdi Tarbaǵataı aýdanynyń ákimi Dildábek Orazbaev.
Azamat QASYM,
«Egemen Qazaqstan»
Shyǵys Qazaqstan oblysy, Tarbaǵataı aýdany, Aqsýat aýyly
