Semeı qalasynyń ákimi Ermak Sálimov aýyl turǵyndarymen esep berý kezdesýlerin ótkizýde. Qala syrtynda 10 aýyldyq okrýg bar. Problemalary da shash-etekten. Osy aýyldardy úsh kún ishinde aralap úlgergen qala basshysy kóptegen máselelerdi sheshý kerektigin anyqtady. Ásirese, aýyl mektepterine robototehnıka men IT synyptar ashý qajet eken.
-Qurmetti aýyl turǵyndary, biz bul máseleden habardarmyz, bıyldan bastap sizderdiń aýyldaǵy mektepterde zamanaýı kabınet bolýy úshin bıýdjetke qarajat bólgizemiz,-dedi qala ákimi Ermak Sálimov,-aýyl mektepteri Nazarbaev mektebiniń úlgisinde damıtyn bolady. Bunyń barlyǵy oblys ákimi Danıal Ahmetovtyń tapsyrmasymen qolǵa alynady.
Aıta ketý kerek, aýyl mektepterin jóndeý de asa qajet eken. Turǵyndardyń bul ótinishine qulaq asqan ákim Ermak Sálimov tórt aýyldyń mektebine bıýdjetten 11 mıllıon teńge bólingenin aıtty. Sodan soń turǵyndar ótinishi boıynsha, aýyldaǵy mádenıet úıleri men klýbtar da nazarǵa alynbaq.
-Qazirgi ýaqytta 13 aýylda klýbtar jáne bir aýylda Mádenıet úıi bar,-dedi qala ákimi Ermak Sálimov,-bulardyń barlyǵyna sizderdiń tilekterińizge oraı, mýzykalyq jabdyqtar men sahnalyq kostıýmder almaqpyz. Dál qazirgi ýaqytta Znamenka, Aınabulaq, Prırechnoe, Jarqyn, Shaqaman, Aqbulaq, Alǵabas, Bókenshi, Qaınar aýyldaryna 2 mıllıon 700 myń teńgege mádenıet salasy boıynsha kómek kórsetildi. Shúlbi aýylyndaǵy kitaphana jóndeldi.
Ákimmen kezdesýde turǵyndar Qaınar jáne Muqyr aýyldaryna kitaphanaǵa kitaptar alý úshin qarajat bólinetindigin estip rıza boldy. Aýylda mal sharýashylyǵy damyp keledi. Aýyl sharýashylyq ónimderi 6,1 paıyzǵa ósken. Prırechnoe aýyldyq okrýginde iri qara maly 14 paıyzǵa artsa, usaq mal 58 paıyzǵa, al Novobajenovo aýyldyq okrýginde jylqy 25 paıyzǵa artqany, qansha degenmen qarapaıym aýyl halqynyń adal eńbegi deýge tolyq negiz bar.
Raýshan QABJANQYZY,
«Egemen QAZAQSTAN»
Semeı
