Sol joly reseılik telebaǵdarlama Adınanyń qabiletin tekserý úshin áıgili «Volshebnık Izýmrýdnogo goroda» kitabynan úzindi alyp, keıbir sóılemderin ózgertip, ózindik synaqtarǵa barǵany este. Adına mundaı qıturqy tórt suraqtyń úsheýine durys jaýap berdi.
Aıtqandaı, Adınany «Tańǵajaıyp adamdar» shoýy shaqyrar aldynda uıymdastyrýshylar bir qýlyqqa barady. Redaktor ekrannan bir mátindi kórsete bergende, baılanys úzilip qalady. Sosyn máskeýlikter qaıta habarlasyp, mátindi qaıta kórsetpek bolǵanda, Adına óziniń oqyp úlgergenin aıtady. Osy jalǵyz jaýap elden erek jetkinshekti áıgili baǵdarlamaǵa bastap aparady.
Árıne, osydan keıin otandyq saıttar bul qyz týraly jarysa jazdy. Aldymen Adına Manatbekova bolyp tanylǵan daryndy qyz tegin ózgertip, qazir Nurlanbaeva bolyp júr. Munyń sebebin túsindirýge asa qulyq tanyta qoımady.
Sonymen, bir kezde kitap oqýǵa qyzyqpaıtyn kádimgi Adınany jyldam oqýdan Qazaqstan chempıony dárejesine deıin jetkizgen anasy – Ardaq.
– 2016 jyly maýsymda anam meni Jyldam oqý úıirmesine jazyp qoıǵanyn aıtqanda, qarsy bolǵanym joq. О́ıtkeni anama meniń kitap oqýǵa qulyqsyzdyǵym unamaıtyn. Kitap oqysam boldy, uıqym kele bastaıdy. Úıirmege osy jalqaýlyǵymdy jeńý úshin bardym, – deıdi sózderi paıymdy qyz.
Adınaǵa ata-analardyń balasyn tabysqa, bilimge jeteleýdiń klassıkalyq úlgisi dep te qaraýǵa bolady.
Ol 3 jasynan bastap anasy «Focus» bıge jetelep aparǵan bala. Al 4 jasynda fortepıanoda oınaı bastaıdy. О́ıtkeni fortepıano da kez kelgen mýzyka quraly sııaqty úlken ónerge jeteleıtin jáne búkil ómirine arqaý bolatyn jol. Odan keıin 5 jasynda shahmat oınap, oılaý, paıymdaý, sheshim qabyldaý ónerine mashyqtanady. Árıne, 6 jasynda mektepke barǵan búldirshin óz ortasynda sýda júzgen balyqtaı bolady.
Osydan keıin 8 jasynda memlekettik «Gúlder» bı ansambline birinshi synaqtan súrinbeı qabyldanady.
Joǵarydaǵy úıirmeniń nátıjesinde jyldam oqýdan Qazaqstan chempıony dárejesine jetken jetkinshek 2017-2018 oqý jylynda «Qazaqstannyń 100 daryndy oqýshysy» kitabyna endi. Adına 2016 jyly mınýtyna 94 myń sóz oqıtyn bolsa, qazir mınýtyna 132 myń sóz oqı alady. Eń bastysy, mazmunyn túsinip, este saqtaı alatyn qabiletke ıe.
Shyndyǵynda, daryndy oqýshy 1 saǵatta tili jeńil 500 bettik kitapty oqı alatyn qabileti bar. О́z erkine salǵanda psıhologııa, medısına jaıly kitaptardy kóbirek oqıdy. Múmkin bul bolashaqta dáriger bolamyn degen armandarynyń bastaýy bolar.
– Jyldam oqý ádisin ártúrli tásildermen meńgerýge bolady. Sonyń biri - alaqandy qoıyp oqý. Al maǵan skaner ádisi unaıdy. Shýlte kestesi óte tıimdi. Kitapty ırek iz, qurbaqa sekirisi, kóldeneń jolmen oqýdy úırendim. Jyldam oqýdy shyndap úırengisi kelgen adam úıirmege barmaı-aq, ınternetten Shýlte kestesi arqyly da meńgere alady, – deıdi Adına Nurlanbaeva.
Qysqasy, redaksııaǵa ájesimen birge kelgen ádemi qyz eńbekpen kelgen eren talantymen bizdi de tańdandyryp baryp, sabaǵyna júgirip ketti. Jyldam oqý degende ol mátinge jolma-jol kóz júgirtpeıdi, mazmunyn «skanerlep» qabyldaıtyn qabiletke ıe.
Aınash ESALI,
«Egemen Qazaqstan»
ALMATY
