Atyraý oblysyna jumys sapary barysynda Májilis depýtattary Amangeldi Dáýrenbaev, Asylbek Smaǵulov jáne Baqytgúl Hamenova Jylyoı aýdanynyń ortalyǵy Qulsary qalasynda «Jyloımunaıgaz» munaı-gaz óndirý basqarmasynyń tynys-tirshiligimen tanysty.
Depýtattar Memleket basshysy belgilegen ekonomıkalyq ósimniń jańa modelin jasaýǵa múmkindik beretin elimizdiń ekonomıkalyq damýynyń negizgi basymdyqtary týraly jáne Májilistiń zań shyǵarýshylyq qyzmeti jóninde keńinen áńgimelep, óndiris qyzmetkerleriniń suraqtaryna jaýap berdi.
* * *
Májilis depýtattary Túrkistan oblysyna sapary aıasynda «Nur Otan» partııasy, Otyrar aýdandyq fılıalynyń kezekten tys konferensııasyna qatysty.
Jıynǵa qatysýshylar elimizdegi negizgi saıası kúsh – «Nur Otan» partııasynyń qurylǵanyna 20 jyl tolǵanyn erekshe aıta kelip, uıym Elbasy, partııa Tóraǵasy Nursultan Nazarbaevtyń tapsyrmasyn basshylyqqa ala otyryp, zaman talabyna saı jańa bıikterdi baǵyndyryp kele jatqanyna toqtaldy.
Májilis depýtaty Maıra Aısına bastaýysh partııa uıymdary árdaıym partııanyń alǵy sheptegi qozǵaýshy kúshi bolǵandyqtan, olarǵa júkteletin jaýapkershiliktiń de zor ekenin alǵa tarta kelip, uıymnyń 20 jyl ishindegi jetistikterine toqtaldy.
* * *
Al depýtattar Arman Qojahmetov, Snejanna Imasheva, Olga Shıshıgına jáne Quralaı Qaraken Qostanaı oblysynyń Qarabalyq aýdanynda iri mal bordaqylaý alańy bar «Astyq ındýstrııasy» agroholdınginiń jumysymen tanysty.
«Astyq ındýstrııasy» agroholdınginiń bas dırektory Dáýlet Ahmetqalıevtiń aıtýyna qaraǵanda, aldaǵy ýaqytta kompanııa 5 myń tonna et óndirip, 2 myń tonnasyn syrtqa jóneltýdi mejelep otyr. Sharýashylyqta sıfrly tehnologııalar da keńinen qoldanylýda. «Aqyldy et fermasy» óz tıimdiligin kórsetip, shyǵyndy azaıtýǵa múmkindik berdi. Iri qaraǵa arnalǵan arnaıy azyq berý júıesi de qurastyrylǵan.
* * *
Májilis depýtaty, «Nur Otan» partııasy fraksııasynyń múshesi Ábdimanap Bekturǵanov Almaty oblysyna jumys sapary barysynda Eskeldi aýdanyndaǵy GES-2 qurylys alańynda boldy.
Depýtat ótken jyldyń qazan aıynda bastalǵan qurylys jumystary barysymen tanysyp, qurylysshylarmen jáne energetıkalyq kompanııa ókilderimen kezdesti.
Jańa elektr stansasynyń mańyzdylyǵyn atap ótken Májilis depýtaty onyń iske qosylýy aımaqtaǵy elektr qýatynyń qunyn tómendetýge kómektesetinine senim bildirdi.
* * *
Soltústik Qazaqstan oblysyna sapary barysynda depýtattar Irına Aronova, Serik Qusaıynov, Abaı Tasbolatov, Irına Ýnjakova, Taras Hıtýov jáne Iýrıı Tımoshenko Kırov atyndaǵy zaýyttyń eńbek ujymymen kezdesti.
Qazirgi ýaqytta zaýyt temirjol avtomatıkasy, telemehanıka, baılanys jáne temirjol kóligi úshin qaýipsizdik júıeleri quraldaryn jasaıdy. Budan basqa, sıfrly teledıdarǵa arnalǵan, medısınalyq mekemeler úshin jabdyqtar, munaı-gaz kesheni úshin ónimder jáne baılanys quraldaryn shyǵarady.
Kezdesý barysynda depýtattar Elbasy Nursultan Nazarbaevtyń bastamalarynyń mańyzdylyǵyna toqtalyp, olardyń ishinde otandyq óndirýshilerdi qoldaý, ınnovasııalyq jáne servıstik sektorlardy damytýǵa baǵyttalǵan jumystaryn erekshe atap ótti.
* * *
«Nur Otan» partııasy Jýaly aýdandyq fılıalynyń kezekten tys konferensııasyna Májilis depýtattary Baqytjan Ertaev, Sapar Ahmetov, Serik Seıdýmanov, Fahrıddın Qarataev, sondaı-aq partııa ardagerleri, Jýaly aýdandyq máslıhatyndaǵy depýtattyq fraksııa músheleri jáne BAQ ókilderi qatysty.
Konferensııada tórt másele qaralyp, tıisti sheshimder qabyldandy.
* * *
Al Batys Qazaqstan oblysy Qaztalov aýdanynda Májilis depýtattary Marat Bopazov pen Artýr Platonov 2017 jyly «Nurly jer» baǵdarlamasy boıynsha salynǵan úılerdi aralap kórdi.
Budan soń Májilis depýtattary «Rýhanı jańǵyrý» jobalyq keńsesinde aýdan jastarymen kezdesti. Sonymen qatar aýdan ortalyǵyndaǵy jańadan jabdyqtalǵan balalar shyǵarmashylyǵy jáne jańa tehnologııalar ortalyǵynda atqarylyp jatqan jumystarmen tanysty.
