«Oı-pikirler túni» halyqaralyq is-sharasy Abaı atyndaǵy QazUPÝ-dyń Sorbonna-Qazaqstan ınstıtýtynda da jalǵasyn tapty. Is-sharany QazUPÝ rektory Takır Balyqbaev, Sorbonna-Qazaqstan ınstıtýtynyń dırektory Aınur Sábıtova jáne Qazaqstandaǵy Fransııa elshiliginiń attashesi Jıl Mamets júrgizip otyrdy.
«Oı-pikirler túninde» ýnıversıtet rektory Takır Balyqbaev, Almaty qalasyndaǵy Fransýz Respýblıkasynyń Bas konsýly Aleksıs Shahtahtınskıı, QR Ulttyq ǵylym akademııasynyń prezıdenti Murat Jurynov, Almaty qalalyq sotynyń Azamattyq jáne ákimshilik ister jónindegi basqarmasynyń tóraǵasy Bahyt Qaseınov, Fransýz saýda-ónerkásiptik palatasynyń vıse-prezıdenti Krıstof Pelısson, S.D. Asfendııarov atyndaǵy QazUMÝ rektory Talǵat Nurǵojın, Qazaqstan-Reseı medısınalyq ýnıversıtetiniń rektory Nurlan Jaınaqbaev, «Ortalyq klınıkalyq aýrýhana» AQ klınıkasynyń vıse-prezıdenti Sholpan Aıýpova jastarǵa quttyqtaý lebizderin joldady.
Fransýz tilinde óz jobalaryn qorǵaǵan stýdentter men magıstranttardyń «Búgingi zamanǵa saı serpilis» taqyryby kópshilik nazaryna usynyldy.
Qazaqstandaǵy «Rýsskıı Regıstr» sertıfıkattaý qaýymdastyǵynyń dırektory Birjan Jantýarov Sorbonna-Qazaqstan ınstıtýtynyń basshylyǵyna «Sapa rastalǵan» sertıfıkatyn tabys etti.
Halyqaralyq shara barysynda Sorbonna-Qazaqstan ınstıtýtynyń qazaqstandyq seriktesi – Qazaqstan Respýblıkasy Tuńǵysh Prezıdentiniń Qory usynǵan «Belgisiz Qazaqstan» jas sýretshilerdiń fotokórmesi, sondaı-aq Nurlan Qılybaevtyń «Myń boıaýly uly dala» kórmesi úlken qyzyǵýshylyq týǵyzdy. Fılosofııa doktory, dızaın kafedrasynyń dosenti Raýshan Qanapıanovanyń jetekshiligimen ótken «Shańyraq» jáne «Jer Ana» sán kórsetilimderi kópshiliktiń kóńilinen shyqty.
Shara sońy ýnıversıtet stýdentteriniń qoldanbaly óner buıymdarynyń kórmesin, arnaıy daıyndalǵan konserttik baǵdarlamany, sondaı-aq fransýz tilinde fılmder tamashalaýmen jalǵasyn tapty.
Elvıra Serikqyzy,
«Egemen Qazaqstan»
ALMATY
