«О́tken aptada úlken jumys atqaryldy. Aqtóbe men oblys aýdandaryndaǵy qoǵamdyq qabyldaýlarǵa 6 myńǵa jýyq adam shamamen 7 myńǵa túrli suraqpen keldi. Barlyq suraqtar, sonyń ishinde barlyq deńgeıdegi ákimderdiń eseptik kezdesýlerinde aıtylǵan suraqtar qatań baqylaýǵa alynyp, tıisti organdar belgilengen tártipte muqııat qaraýlary kerek. Birde bir suraq jaýapsyz qalmaýy qajet»,- dedi Berdibek Saparbaev.
Negizinen, aqtóbelikter turǵyn úı máselesin jaqsartý, ataýly áleýmettik járdemaqy taǵaıyndaý, jeke turǵyn úı qurylysy úshin jer telimin alý, sonymen qatar bilim, densaýlyq saqtaý, turǵyn úı-kommýnaldyq sharýashylyq salalaryna qatysty máselelerimen júgindi.
Máseleniń deni sheshildi. Mysaly, demeýshilerdiń qoldaýymen júzdegen otbasyǵa kómir, azyq-túlik jáne t.b. berildi. Eki kópbalaly januıa baspanaly boldy, basqasyna jeke turǵyn úı qurylysy úshin Qýraıly aýylynan jer telimi beridi, demeýshi úıdi salý úshin kómek kórsetetin bolady. Mesenattar kolledjde oqıtyn bir aqtóbeliktiń oqýyn tóleýge kómektesse, múmkindigi shekteýli qala turǵynyna «Qolǵanat» qoǵamdyq qory arqyly jeke isin ashýǵa grant bólindi. Endi jeke kásibin ashqan er adam júk tasýmen aınalysyp otbasyn asyraı alady. Bul kómekke muqtaj azamattardyń ótinishterine qaıtarǵan jaýaptardyń az ǵana bóligi.
Aıta keteıik, oblysta az qamtylǵan azamattardyń mekenjaılaryna baryp, qoldan kelgen kómekterin kórsetetin mobıldi toptar óz jumystaryn jalǵastyryp jatyr. Atalmysh jumystyń nátıjesinde yqtımal áleýmettik kómekterdi ári qaraı kórsetý tetikteri qarastyrylýda.
«Kómek asa muqtaj jandar men otbasylarǵa zań sheńberinde kórsetiletin bolady. Biz buǵan kásipkerlerdi, demeýshilerdi tartatyn bolamyz»,- dedi oblys ákimi. Ol sondaı-aq, azamattardyń ótinishteri men atqarylǵan jumystardyń nátıjesin saraptaý qajettigin de atap ótti.
Memleket basshysynyń halyqtyń ál-aýqatyn kóterý týraly tapsyrmasyn oryndaý aıasynda Aqtóbe oblysynda 2019 jyly kópbalaly, tabysy az otbasylardy jáne az qamtylǵan azamattardy áleýmettik qoldaýdyń qosymsha sharalary engiziletin bolady.
Atap aıtqanda, kópbalaly otbasylar turǵyn úı satyp alý úshin bastapqy jarnany sýbsıdııalaý mehanızmi ázirlenýde. Az qamtylǵan otbasylarǵa tólenetin bir jolǵy áleýmettik járdemaqy 70 myńnan 140 myńǵa teńgege deıin óspek. Az qamtylǵan otbasylardyń balalary úshin mektepke deıingi mekemelerdegi tamaqtaný tólemi 70% -ǵa azaıady. Halyqtyń áleýmettik jaǵynan az qamtylǵan bóligin oqytýǵa, qaıta daıarlaýǵa qosymsha 200 mln teńge bólinedi, jalpy, halyqtyń áleýmettik jaǵynan áljýaz toptarynyń ishinen 3 myń aqtóbelik qaıta oqytylyp, taǵy 5 myń adam turaqty jumys oryndaryna ornalasady. Atalǵan sharalardy júzege asyrý úshin 1 mlrd teńge bólinedi.
