Statıstıkalyq málimetke súıensek, Almaty men Astana sııaqty iri qalalardan keıin, Aqmola oblysy atalǵan baǵdarlama boıynsha ıpoteka berýden úzdik úshtiktiń qatarynda. Búgingi kúnge deıin aımaqta jalpy quny 2 mıllıard teńgeden astam somaǵa 200-den astam ótinim qanaǵattandyrylǵan.
– Búgingi tańda baǵdarlama sátti júzege asyp keledi. Ár otbasynyń baspanaly bolýyna taptyrmas múmkindik týyp otyr,–deıdi Ulttyq Bank oblystyq fılıalynyń bólim jetekshisi Ásel Nurqanova.
– Eldiń áleýmettik-turmystyq jaǵdaıyn jaqsartýǵa zor septigi tıip tur. Máselen, páter jaldaıtyn bolsań aı saıyn qyrýar qarjy tóleısiń. Kúnderdiń bir kúninde jaldaǵan páterińnen kóship ketseń, bári zaıa. Al, osy baǵdarlamamen óziń úı alyp, aı saıyn tólep otyrsań túptiń túbinde tolyq qojaıyn bolasyń,–deıdi Kókshetaý qalasynyń turǵyny Serik Qalmuratov.
Qazir qala turǵyndary baǵdarlamanyń jaı-japsarynan qulaǵdar. Sondaı-aq, Ulttyq Banktiń mobıldi qosymshasynda «7-20-25» degen arnaıy bólim bar. Munda ár adam baǵdarlamaǵa qatysty óz suraqtaryna jedel túrde jaýap ala alady. Esterińizge sala keteıik, Kókshetaýda baǵdarlama boıynsha ıpotekalyq nesıelendirý bastapqy naryqtaǵy turǵyn úıge 15 mıllıon teńge kóleminde jasalady.
Baıqal BAIÁDIL,
«Egemen Qazaqstan»
