Alǵashqy mysaldy kórshiles Reseıden bastasaq, qazirgi ýaqytta 2016 – 2020 jyldarǵa arnalǵan «Turǵyn úı» federaldyq nysanaly baǵdarlamasy 5 baǵytta jumys isteıdi. Bir bólimi retinde jas otbasylardy turǵyn úımen qamtamasyz etý bekitilgen. Budan basqa, memleket turǵyn úı qurylysynyń sheńberinde qurylys salýshylar qyzmetin «Reseı otbasyna arnalǵan turǵyn úı» kishi baǵdarlamasy sheńberinde yntalandyrady.
Al Túrkııa 2011 jyldyń sońynda tabysy ortasha azamattar úshin shamamen 202 myń, turmysy tómen jáne kedeı otbasylar úshin 140 myń úı saldy. Turǵyn úı qurylysyn damytý jónindegi basqarmasy 2023 jylǵa qaraı Túrkııada shamamen 500 myń turǵyn úı salýdy josparlap otyr. Sonymen qatar turaqty tabysy joq nemese tabysy tómen halyqtyń az qamtamasyz etilgen toptary úshin alańy 45-ten 65 sharshy metrge deıin, jalǵa beriletin, aı saıynǵy tólem mólsheri 80 AQSh dollaryn quraıtyn − 20 jyl ishinde óteý merzimimen turǵyn úı berý kózdelgen. Bul rette turǵyn úıge aqy tóleý qonystanǵannan soń 2 jyldan keıin ǵana júrgiziledi.
Shveısarııa federaldyq, kantonaldyq jáne mýnısıpaldyq deńgeılerde qoǵamdyq muqtajdyq úshin turǵyn úı salatyn uıymdar qurýdy jáne olardyń jumys isteýin qoldaıdy. Sonymen birge memleket jeńildikti qaryzdar, sýbsıdııalar, salyqtyq preferensııalar, tómen baǵamen jer ýchaskelerin berý, kepildikter berý arqyly olardyń qyzmetin yntalandyrady.
Belarýs eliniń turǵyn úı saıasaty 2016 – 2020 jyldarǵa arnalǵan «Turǵyn úı qurylysy» memlekettik baǵdarlamasyna sáıkes júrgiziledi. Baǵdarlama jeńildetilgen nesıeler men sýbsıdııalar túrinde memlekettik qoldaýdy alýǵa quqyǵy bar azamattar úshin turǵyn úı salyp, ınjenerlik jáne kóliktik ınfraqurylymy bar nemese osyndaı aýmaqtarǵa barynsha jaqyn aımaqta jer ýchaskelerin berý arqyly jeke turǵyn úı qurylysyn damytý baǵyttary boıynsha jumys isteıdi.
Qarlyǵash QURAMYS,
«Egemen Qazaqstan»
