Búginde elimizde turǵyn úı máselesin sheshýge baǵyttalǵan birneshe baǵdarlama bar. Memleketten sýbsıdııa alý arqyly «Nurly jer» baǵdarlamasy boıynsha turǵyn úıge qol jetkizýge bolady. Baǵdarlamaǵa Qazaqstan Respýblıkasynyń kez kelgen azamaty qatysa alady. Bul úshin:
- bankke naryqtan bastapqy turǵyn úı satyp alý maqsatynda jeńildetilgen kredıt alý úshin ıpotekalyq qaryz alýǵa qujattardy (bastapqy turǵyn úıdiń jáne óziniń jeke qujattary) jáne sýbsıdııa alýǵa ótinish berýi tıis;
- ishki qujattarymen belgilengen prosedýralarǵa sáıkes bank tólem qabilettiligin jáne usynǵan kepildikti baǵalaıdy;
- ıpotekalyq qaryz berý týraly ońtaıly sheshim qabyldanǵan jaǵdaıda, bank 3 jumys kúni ishinde Qazaqstan ıpotekalyq kompanııasyna sýbsıdııa berý týraly qoldaýhat joldaıdy;
- Ipotekalyq kompanııa 5 jumys kúni ishinde qujattardyń baǵdarlama talaptaryna sáıkestigin tekseredi jáne sýbsıdııalaý týraly sheshim qabyldaıdy;
- shyǵarylǵan sheshimniń negizinde bank qaryz alýshymen banktik qaryzy, tóleý kestesin, ıpotekalyq kelisimin jasasady.
Bul baǵdarlama boıynsha Astana, Almaty qalalaryndaǵy turǵyn úıdiń ár sharshy metriniń baǵasy 180 myń teńge, al elimizdiń basqa aımaqtarynda 140 myń teńge bolmaq.
Búginde turǵyn úı baǵdarlamalarynyń ishindegi eń tıimdisi – «Nurly jer» baǵdarlamasy. О́ıtkeni nesıe mólsherlemesi 5%. Satyp alatyn úıińizdiń tolyq baǵasynyń 20%-yn tólep, 3 jyldan 25 jylǵa deıin nesıe alý múmkindigi bar.
Odan bólek, banktiń qurylys kompanııalarymen birlesken «7-20-25» baǵdarlamasy bar. Bul baǵdarlamanyń «Nurly jerden» aıyrmashylyǵy – nesıe mólsherlemesiniń 7% bolýynda. Bul baǵdarlama «Bank SentrKredıt», «ATF Bank», «Eýrazııalyq Bank», «RBK Bank», «Halyq Bank» syndy birqatar bankpen seriktestik arqyly júzege asyrylady. Tolyq somanyń 20%-y tólengen turǵyn úıdiń qalǵan aqysy 25 jylǵa deıin atalǵan bankter arqyly nesıege beriledi.
Joǵaryda aıtylǵan baǵdarlamalar arqyly úı alý úshin QTQJB bankiniń salymshysy bolýy qajet. Bank depozıtteriniń kólemi ártúrli. Soǵan baılanysty aı saıynǵy jarnanyń da mólsheri belgilengen.
Daıyndaǵan Svetlana ǴALYMJANQYZY,
«Egemen Qazaqstan»
