Aıta ketsek, Bangalor qalasy – Úndistandaǵy kıno óndirisi boıynsha eń aldyńǵy qatardaǵy ortalyqtarynyń biri. Jyl saıyn bul qalada 200-ge jýyq fılmder jaryqqa shyǵady, olardyń kóbi halyqaralyq kınofestıvalderde bıikterden kórinip, kınosynshylardyń joǵary baǵasyna ıe bolǵan týyndylar.
«Bizdiń fılm mıfologııalyq negizde zamanaýı álemdi abstrakty sıýjet retinde usynady. Ejelgi dúnıetanymdy qazirgi logıkalyq kózqaraspen aýystyrsaq ne bolar eken degen fantazııalyq oıdan týǵan týyndy. Sondyqtan da maǵan osy turǵydan kórsetýge qyzyq bolyp kórindi. Festıvaldiń bastalǵanyn asyǵa kútip júrmin, meniń oıymsha baǵdarlamasy qyzy bolatyn sekildi», - deıdi rejısser Ádilhan Erjanov.
Esterińizge sala ketsek, «Tún qudaıy» fılmi 40-Máskeý halyqaralyq kınofestıvaliniń negizgi konkýrsy sheńberinde kórsetilgen bolatyn. Sondaı-aq atalǵan kınotýyndy Parıjde ótken L’Etrange Festival jáne Reseıdegi «Kraı sveta» kınofestıvalderinde kórsetildi. Odan bólek, «Tún qudaıy» fılmi Indonezııada ótken Jogja kınofestıvaliniń «Azııalyq fılmder» baıqaýyna jáne 14-Sh.Aımanov atyndaǵy halyqaralyq kınofestıvaline qatysqan bolatyn.
Bengaluru International Film Festival kınofestıvalinde azııalyq jáne úndi fılmderine arnalǵan eki konkýrstyq baǵdarlama bar. Sonymen qatar, festıval sheńberinde konkýrstan tys «Álemdik panorama» baǵdarlamasy, sondaı-aq, FIPRESSI jáne NETPAK qazylar alqasy jumys isteıdi. Bıyl festıval sheńberinde Ingmar Bergmannyń retrospektıvasy (metrdiń 100 jyldyǵyna oraı) jáne Mahatma Gandıdiń ómiri týraly baıandaıtyn (úndi saıası jáne qoǵam qaıratkeriniń 150 jyldyǵyna oraı) fılmderdiń retrospektıvasy uıymdastyrylǵan.
Halyqaralyq kınofestıvalderde tanylǵan fılmderge arnalǵan «Álemdik panorama» konkýrstan tys baǵdarlamasy aıasynda «Qazaqfılm» kınostýdııasynyń taǵy da bir tyń týyndysy – rejısser Emır Baıǵazın túsirgen «О́zen» fılmi kórsetiledi.
Aıgúl AHANBAIQYZY,
«Egemen Qazaqstan»
ALMATY
