Kópbalaly otbasylarǵa kámeletke tolmaǵan tórt jáne odan da kóp balalary bar otbasylar jatady. Jumyspen qamtý jáne áleýmettik qorǵaý basqarmasynyń málimetinshe, búgin Astanada 434 otbasyǵa ataýly áleýmettik kómek kórsetiledi.
Basqarma ókilderi aldymen Nursulý Esjanovaǵa keldi. Onyń balasyna múgedektik boıynsha járdemaqy taǵaıyndalǵan. Sebebi onyń qyzy Aızada ózdiginen qozǵala almaıdy. Osyǵan sáıkes, otbasy barlyq qajetti járdemaqyny alyp otyr. Sábı únemi medısınalyq tekserýden ótip turady. Jaqynda anasynyń ótinishi boıynsha olarǵa qazaqstandyq óndiristiń jańa arbasy berildi. Qyz ben onyń ápkesi syılyqty úlken qýanyshpen qabyldady. Jańa arbanyń yńǵaılylyǵy óz aldyna, sondaı-aq ol balanyń parametrleri boıynsha daıyndalady. Jınalmaly arba balanyń ósýine qaraı retteledi de.
Arbalardy «Dos.«Táýelsiz ómir» ortalyǵy múgedekterdiń qoǵamdyq birlestigi daıyndaıdy. 2019 jyldyń basynan 4 arba berildi. Bala ósken jaǵdaıda, otbasy olardy Ortalyqqa qaıtara alady nemese qaıyrymdylyqqa bere alady. Odan ári biz Myrzaǵalıevter otbasyna bardyq. Otbasy búgin bes balany tárbıeleýde. Eń kishi balasy 7 aıda. Otbasynyń anasy jumyspen qamtý basqarmasynyń ókilinen qajetti qujattar paketin qalaı alýǵa bolatynyn túsindirýdi surady.
Almaty aýdany áleýmettik járdemaqy taǵaıyndaý bóliminiń bas mamany Naǵıma Manaqbaeva kópbalaly anaǵa áleýmettik kómek alýdyń joldary týraly aıtyp berdi.
«Qazirgi ýaqytta kópbalaly analardyń ótinishi boıynsha basqarma qyzmetkerleri bizdiń vedomstvo jelisi boıynsha ataýly áleýmettik kómek kórsetý boıynsha túsindirý jumystaryn júrgizýde. Mysaly, bul januıada jeti adam bar: ata-anasy jáne bes bala. Otaǵasy jaldamaly qyzmetker bolyp jumys isteıdi. Olar jumysqa ornalastyrý jáne áleýmettik qorǵaý bólimine ótinish jasaýǵa jáne qarastyrylǵan áleýmettik tólemderdi alý úshin qujattardy tapsyrýǵa quqyly. Otbasynyń barlyq músheleriniń jeke basyn kýálandyratyn qujattar, otbasynyń tabysy týraly anyqtama qajet. Osy qujattardyń negizinde járdemaqy taǵaıyndalady. Budan keıin balalar oqıtyn mektep ákimshiligine otbasy jaǵdaıy tómen ekendigin rastaıtyn anyqtama jiberiledi», dedi Almaty aýdany áleýmettik járdemaqy taǵaıyndaý bóliminiń bas mamany Naǵıma Manaqbaeva.
