Jınalystyń birinshi kúninde Qazaqstannyń shet elderdegi birqatar dıplomatııalyq mıssııalarynyń basshylarymen qatar, Prezıdent Ákimshiligi, Premer-Mınıstr Keńsesi, ortalyq jáne jergilikti atqarýshy organdar, kvazımemlekettik sektor men Qazaqstannyń ulttyq kompanııalarynyń ókilderi qatysty.
Otyrys barysynda Prezıdent Nursultan Nazarbaevtyń syrtqy saıası vedomstvosynyń ınvestısııalardy tartý jáne qazaqstandyq eksportty jyljytý bóligindegi jumysyn kúsheıtý jónindegi tapsyrmalaryn júzege asyrý joldary egjeı-tegjeıli qaraldy. Instıtýsıonaldyq ózara is-qımyl mehanızmderi men ınvestısııalardy tartýdyń praktıkalyq aspektileri talqylandy. Eksportty jyljytý barysynda elimiz tap bolatyn erekshe jáne óńirlik syn-qaterler zerdelendi.
Elbasynyń tapsyrmasy boıynsha memlekettik organdar, ulttyq kompanııalar, ákimdikter men elimizdiń shet elderdegi mekemeler arasynda ózara is-qımyldy qurý úshin ınvestısııalyq klımattyń keshendi ekojúıesi qurylýda. Qazaqstan óńirlerinde ınvestorlarmen jumys isteý jónindegi front-ofıster qurylýy tıis, onda ınvestor bıýrokratııasyz óz jobalaryn iske asyrýda praktıkalyq jáne dáıekti kómek alatyn bolady. Sheteldik ınvestorlarmen ózara is-qımyl júıesi prosestiń árbir qatysýshysynyń jaýapkershilik aımaǵyn aıqyndaıdy.
Syrtqy ister mınıstri Beıbit Atamqulov Qazaqstannyń elshileri yqtımal ınvestorlarmen tıimdi jumys isteý úshin ınvestısııalyq usynystar men jobalar paketterin qosa alǵanda, barlyq ózekti aqparatpen «qarýlanatynyn» atap ótti. Bul aqparatta qarjylyq kórsetkishter, naryqqa kirý sharttary, jer ýchaskelerin bólý, ınfraqurylymmen qamtamasyz etý, kedendik jáne salyqtyq preferensııalar, tarıftik quramdaýyshtar, eńbek resýrstarymen qamtamasyz etý kórsetiledi. Vedomstvo basshysy atap ótkendeı, elshilikter Qazaqstan ekonomıkasyna ınvestısııa men jańa ǵylymdy qajetsinetin tehnologııalardy tartý boıynsha jumysty kúsheıtýi tıis.
Otyrys sheńberinde Syrtqy ister mınıstriniń orynbasary Ermek Kósherbaev, Aýyl sharýashylyǵy mınıstriniń birinshi vıse-mınıstri Arman Evnıev, Qazaqstannyń Reseıdegi Elshisi Imanǵalı Tasmaǵambetov, Qytaıda - Shahrat Nuryshev, AQSh-ta - Erjan Qazyhanov, Ulybrıtanııada - Erlan Ydyrysov, SIM Investısııa komıtetiniń tóraǵasy Erlan Haırov, «Kazakh Invest» UK» AQ Basqarma tóraǵasy Saparbek Tuıaqbaev jáne «Astana» Halyqaralyq qarjy ortalyǵynyń Basqarýshysy Qaırat Kelimbetovtiń baıandamalary tyńdaldy.
