Jas juldyzdar jarqyly

Seısenbi, 11 jeltoqsan 2012 7:29

T.Júrgenov atyndaǵy Qazaq Ulttyq óner akademııasy stýdentteriniń Máskeýdegi Memlekettik Estrada Teatrynda tabysty ótken konserti ulttyq estrada kelesheginiń jańa kókjıekterine umtyldyrady
Máskeý kúni bulyńǵyrlaý bolǵany­men, Almatydan kelgen jas daryn ıele­riniń kóńilderi jaımashýaq. Kólge bitken kók quraqtaı, osyndaı balǵyn da balaýsa shaqta Reseı astanasyndaǵy álemge áıgili teatr sahnasynda óner kórsetý baqyty ekiniń biriniń mańdaıyna buıyra ber­meı­tinin, álbette, olar jaqsy túsinetin sııaqty.

Seısenbi, 11 jeltoqsan 2012 7:29

T.Júrgenov atyndaǵy Qazaq Ulttyq óner akademııasy stýdentteriniń Máskeýdegi Memlekettik Estrada Teatrynda tabysty ótken konserti ulttyq estrada kelesheginiń jańa kókjıekterine umtyldyrady
Máskeý kúni bulyńǵyrlaý bolǵany­men, Almatydan kelgen jas daryn ıele­riniń kóńilderi jaımashýaq. Kólge bitken kók quraqtaı, osyndaı balǵyn da balaýsa shaqta Reseı astanasyndaǵy álemge áıgili teatr sahnasynda óner kórsetý baqyty ekiniń biriniń mańdaıyna buıyra ber­meı­tinin, álbette, olar jaqsy túsinetin sııaqty.

«Qazaqstan estradasy – jańa esimder» atty osynaý erekshe konsert «Reseı – Qazaqstan: HHI ǵasyr» festıvaliniń shy­myldyǵyn jabý aıasynda ótip, ol eń aldymen elimizdiń Tuńǵysh Prezıdenti kú­nin merekeleý qurmetine, sondaı-aq táýel­siz Qazaqstan men Reseı arasyndaǵy dostyq ráýishti dıplomatııalyq qatynas­tardyń 20 jyldyǵyna arnaldy. Eki jaq úshin de birdeı ıgilikti is-sharanyń yqy­lasty uıymshyldyqpen ótýine Reseı Fe­derasııasynyń Mádenıet mınıstrligi, Qa­zaqstannyń Mádenıet jáne aqparat, Bilim jáne ǵylym mınıstrlikteri, sonymen birge, Reseıdegi bizdiń elshilik tarapynan qoldaý bildirilse, konserttiń bar­lyq aýyrtpalyǵy men jaýapkershiligin moıyndaryna alyp, ystyq-sýyǵyn bó­lisken tikeleı uıymdastyrýshylary T.Júrgenov atyndaǵy Qazaq Ulttyq akademııasy men Reseıdiń Festıvaldar, konkýrstar jáne sheteldermen mádenı yntymaqtastyq jó­nindegi Halyqaralyq ortalyǵy ekendigin aıta ketken lázim.
Osy aradaǵy úılesimdiliktiń bir gábi, bylaısha aıtqanda, tabys kilti atalmysh mekemeler basshylarynyń beıil-belsen­diliginde jatqanyn da ańǵarǵandaımyz. О́tken jylǵy jeltoqsannyń basyndaǵy konsertteri máskeýlikterge unap qalǵan­dyqtan, Reseıdiń Mádenıet mınıstrligi bıyl Qazaq óner akademııasyn óz astanasyna ekinshi ret shaqyryp otyr. Rektor Arystanbek Muhamedıulynyń aıtýynsha, shaqyrýshy jaq konsert shyǵyndaryn túgeldeı ózderi kótergen. Qazaqtyń jas óner juldyzdary, balaýsa daryndary ataqty sahnada ekinshi márte án shyrqaýǵa laıyqty dep tapqan. Árıne, kórermen talǵamyna qanyq, kánigi uıymdastyrý­shylar mundaı shyǵynǵa tekten-tek barmasa kerek. Konsert bir demmen tamasha aıaqtalǵan kezde Halyqaralyq mádenı ortalyqtyń dırektory Vladımır Lınchevskıımen de tildesip qalýdyń sáti túsken. Vladımır Nıkolaevıch Qazaqstan­nyń týmasy eken. Biraz jyldar boıy Pavlodar oblystyq fılarmonııasyna basshylyq etipti. Máskeýde de mańaıyna Qazaqstanǵa degen súıispenshilik uryǵyn egip júretini kórinip tur. Arystanbek baýy­rymyzben de ráýishti dostyq qaty­nasta ekendigi baıqaldy.
– Qazaqstan tarapyna árdaıym izgi júrekten shyqqan iltıpatty lebizderimdi aıta júremin, – deıdi V.Lınchevskıı áli jańa ǵana tyńdaǵan ánderdiń ǵajap áse­rinen aryla almaǵan qalpynda. – Kon­sert­tiń basy jaqsy bastaldy, jalǵasy odan da tamasha boldy. Sizderdiń jastarmen birge ózimiz de ósip, kóńilimiz kór­ke­ıip qaldy. Ulttyq órnek te, orys ánderi de jeterlik. Munyń ózi bar jaǵynan máskeýlik kórermenge degen qurmet qoı. Sonymen birge, álemdik klassıka men estrada mádenıetine zor qushtarlyqpen kirgen, tabıǵı kirige bilgen.
T.Júrgenov akademııasy talanttary­nyń ónerin osylaı baǵalaı kele, Vladımır Nıkolaevıch eki eldiń dostyǵymen órnek­telgen osyndaı konsertterdiń aldaǵy ýaqytta dástúrge aınalatyndyǵyna úmit­tenetinin aıtty. Qazaq óneriniń Máskeý­degi osyndaı úlken júrekti janashyr dosyna Qazaqstannyń eńbek sińirgen máde­nıet qyzmetkeri ataǵy berilgendigi, onyń óz elimizdiń «Dostyq» ordenin taǵyp júrýi qandaı ǵanıbet.
Bizdiń jas talanttardyń ónerin tama­shalaýǵa kelgen qaýymnyń teatr zalyn lyq toltyrýy Máskeýde Qazaqstan­nyń dostary kóp ekendiginiń taǵy bir aıǵaǵy dep bildik. Osy tilektes áleýmetke qazaq­standyq órender ótken jylǵydan da aı­shyqtyraq óner kórsetkeni aıqyn sezilip turdy. Meniń jaı tyńdarman retinde qyzyǵa nazar aýdarǵanym: árbir nómirden keıin «Bravo» degen delebe qozdyrar rızashylyq únderi, shat aıqaılar qulaq tundyrdy. Orystyń «bravosy» qazaqtyń «bárekeldisi» ǵoı. Ár rettegi sol «Bravolardy» estigen saıyn ishteı shúkirana­mazdy aıtyp, kóktemdegi kókteı qaýlaǵan jaýqazyn jastarymyzǵa biz de «Báre­keldi!» dep marqaıa mereılenip otyrǵany­myzdy nesin jasyraıyq.
Gúl jaınap, qulpyra túrlengen qazaq ánderi, orys kompozıtorlarynyń shyǵar­malary, álemdik án jaýharlary ǵajap oryndalǵany sonshalyq, pikir aıtýshy kórermender konserttik baǵdarlamany Reseı men Qazaqstannyń tańdaýly telearnalarynda jarqyrata kórsetýge ábden laıyqty dep baǵalady. Arystanbek Mu­ha­medıuly aıtsa aıtqandaı, tyńdaý­shy­sy kelisken Máskeýdiń konserttik zaldary ózindik synaq alańy ekeni de ras-aý. Olaı bolsa, Estrada teatrynyń sahnasynda óner kórsetýi qazaqtyń jas daryn­dary­nyń ómirinde óshpes iz qaldyrary da sózsiz. Kim biledi, keleshekte osynaý óren stýdentter arasynan ulttyq ónerimizdiń dańqyn asyryp, maqtanyshyna aınalar eren tulǵalary shyǵatyn kúnder de alys emes shyǵar. Qalaı desek te, osy jas talaptarǵa – ázirge kópshilikke belgisiz esimderge úlken sahnada ózderin tanytýǵa múmkindik berilip otyrǵany qýantady.
Stýdenttermen birge Qazaqstannyń halyq artısi, О́ner akademııasynyń professory Roza Rymbaeva men respýb­lı­kanyń eńbek sińirgen qaıratkeri, akademııa ustazy Tolqyn Zabırovanyń óner kórsetýi jańǵyra jalǵasqan urpaq sa­baq­tastyǵyn pash etip, ózi de shyraıly kon­sertti odan ári kórkeıtip jiberdi. Roza Qýanyshqyzy naq osy sahnada Keńes Odaǵynyń basqa da artısterimen birge án qanatynda alǵash atoılaı qalyqtaǵan alys jyldardy, top jarǵan jalaýly jastyq shaǵyn saǵynyshpen eljireı eske aldy.
Qazaqstannyń jas estradasynyń kon­serti Qazaqstan týraly asqaq ánmen bas­talýy zańdy edi. Baýyrjan Retbaevtyń oryndaýyndaǵy Meıirbek Atabaevtyń osy­naý keń tynysty ánin meıirlene tyńdadyq, keýdeni elimiz ben jerimizge degen bir maqtanysh sezimi kernedi. «Qa­zaq­stanym, jerim baıtaǵym, án aıtsam da sen dep shyrqap aıtamyn», dep qaıyr­masyna ishteı ilese, úndese qosylyp otyrdyq. Odan soń Berdibek Qulǵaraev, Ermek Dıdar, Erjan Musyrmanqulov, Aıdarbek Dúısebaev, Janel Bolat, Ba­qytgúl Bekbergenova, Marhaba Sábıeva, Aına Qalmaǵambetovalardan quralǵan stýdentter toby keńes kompozıtorla­rynyń belgili ánderinen poppýrı shashýyn shashty. Osy án shashýynan erekshe shýaq sebelegendeı, kórermender kúlim qaǵyp qýanyp qaldy. El men eldiń ajyramas dostyǵyn, dánekerdiń myqtylyǵyn da osynaý ár júrekke ystyq «Staryı klen», «Horoshıe devchata», «Shar golýboı», «Pervym delom samolety», «Iа lıýblıý tebıa jızn» ánderiniń sonshalyqty ásem oınaqylyqpen, júrek qylyn sherte qysqa qaıyrym oryndalýy aıǵaqtaı beınelep turǵandaı edi. Máskeýlik ánsúıer qaýymǵa qazaqtyń ónerpaz órenderi bir sát osy poppýrı arqyly: «Iá, biz táýelsiz eldiń jastarymyz», biraq biz sizderge adal dospyz» dep aıtqandaı edi. Bizdiń jastar Máskeý sahnasynda el ımıdjin osylaı kóterdi, el mereıin osylaı asyrdy.
Kelesi poppýrı kezegi belgili qazaq sazgerleriniń ánderine berildi. Joǵary­daǵy oktet quramynda bolǵan súıkimdi qyzdar kvarteti. Iá, Janel men Baqytgúl, Marhaba men Aına zalǵa qazaq ánderiniń kógildir kóktemin syılaǵandaı boldy. Máskeý tyńdarmanyn mahabbatpen, jas­tyq shaqtyń jaıdarman kúnshýaǵymen, aq jaýyndy sezimdermen aıalaǵan bul ánder «О́mir ózen», «Arys jaǵasynda», «Syrlasý valsi», «Keshikpeı kelem dep eń», «Qaıyqta» ekenin de aıta keteıik. Qaı­ran, Shámshi! Ániń seniń aqqanat dostyq ráýish elshiligine máńgilik júre berer. Naq osy nómir aldyńǵyǵa qosa konsert baǵdarlamasyndaǵy eń áserli de aımań­daı nómir bolǵan sııaqty. О́z paıymdaýymyzda da, qaýymnyń qabylda­ýyn­da da.
Osy joly estrada oryndaýshylarymen birge bıshiler de kelgen eken. Bul – konsertke akademııanyń horeografııa fa­kýltetiniń qosqan úlesi ekeni anyq. Qalaı bolǵanda da, «Passodobl» bıi men Arystanbek Muhamedıulynyń «Valsin» Evgenıı Moıseev pen Mádına Aldambergenova, Raýan Rahymjanov pen Ksenııa Pahomovalar shyr kóbelek úıirile, quı­qyljyta shalqyp, jeńil qalyqtap, ná­shine keltire usyndy. Akademııa stýdenti Danıel Danladı oryndaýyndaǵy Jeńis Seıdollaulynyń «Qııalı qyz» áni de ózgeshe sánimen, órnekti ekzotıkasymen, sahnalyq shabytty erkindigimen, qylyq­ty erkeligimen ezý tarttyra, jaqsy qabyldandy.
Máskeýde óner kórsetken eki jas darynǵa, baıqaýymyzsha, eki dosqa erekshe toqtalǵymyz keledi. Onyń biri – Álı Oqapov. Iá, ıá, bir kezderde Roza Rymbaevany ashyp, juldyzyn jarqyratqan, qazaq estradalyq mýzykasy izasharla­ry­nyń biri Tasqyn Oqapovtyń uly – Álı. «At tuıaǵyn taı basar» degen osy. Álı jastaıynan pıanınomen aınalysypty. Qazir – óner akademııasynyń stýdenti. Ataqty anasynyń kómegine de, bedeline de júginbeı, óz taǵdyryn ózi jasaýǵa umtylýda. Sońǵy ýaqytta án aıta bas­taǵan. Bul kúnde ózindik baǵyt ustanyp, estradalyq ánderdiń oryndalýyna bı elementin kóbirek qosyp, kórermendi solaı jaýlaǵysy keledi. 21 jastaǵy izdengish Álı Máskeýge aqyn Ibragım Isaevtiń sózine jazylǵan óziniń «Ar­man­ǵa» atty ádemi ánin ala kelipti. Horeo­grafııalyq beıneli sýretpen órnektelgen, qımyl hám yrǵaq tilimen aıshyqtalǵan Álı Oqapovtyń áni de máskeýlik tyń­darman júregine uıalap unaǵanyn «Bravo!» degen aıqaılar aıtpaı-aq bildirdi. Konsert bastalar aldynda ǵana áńgime­leskenimizde: «Estradalyq ánniń árin keltirip, janyn kirgizetin – bı ǵoı, aǵa» degen Álı sózine de endi den qoıǵan­daımyn.
Ánshilik talanty aıqyndalyp, ár jerde moıyndalyp ta úlgergen jastyń biri Batyrjan Tazabekov bolyp shyqty. Operalyq tabıǵı tamasha daýysymen mamandardy tań qaldyryp júrgen ol The Jigits tobynyń quramynda án salady. Bul top bıyl jazda Iýrmalada ótken «Jańa tolqyn» jobasynda tórtinshi oryndy enshilepti. Sonymen birge, Batyrjan re­seı­lik «Juldyzdar fabrıkasy» jobasy­nyń da aqtyq synynda óner kórsetken kórinedi. Prodıýseri – Baıǵalı Serkebaev. Jyl basynda «Sábı» qory uıymdas­tyrǵan áleýmettik-mádenı aksııa aıasynda Amerıkada án shyrqaıdy. Sol joly baǵyn synamaqqa Djılıart akademııa­syn­daǵy tyńdalymǵa tússe, synnan mú­dirmeı ótedi. Biraq bizdiń jigit ol már­tebeli oqýdan bas tartady. Osy joly Batyrjan dúnıe júzine máshhúr Devıd Fos­terdiń ánderin ıtalıan tilinde áýelete erkin shyrqap, eldiń rızashylyǵyna bó­lendi. Búgingi jas juldyz qazaq estra­dasynyń erteńgi bas juldyzyna aınalsyn dep tileıik, aǵaıyn.
Qalaı desek te, A.Qalmaǵanbetova, M.Sábıeva jáne J.Bolat quramyndaǵy qyzdar trıosy, Berdibek Qulǵaraev, Dıas Núsipov, Nursaıat Serikbaev, Erjan Musyrmanqulov syndy jas daryndar baryn sala, janyn shaǵa tańǵy shyqtaı móldiregen tamasha taza daýystarymen shyrqaǵan, ásem bımen áserlendire ádip­telgen álemdik shlıagerler men orys án­deri, sonyń ishinde, ásirese R.Kochchıan­te­niń jalpyǵa máshhúr «Noterdam de Parı» mıýzıkli jıylǵan talǵampaz kópshiliktiń kóńilinen tabyldy deı alsaq kerek. Bir ǵana túıtkil, shirkin-aı, osy jaýharlar­dyń arasynda qazaqtyń darqan janynyń, jazıra dalasynyń beınesindeı bolyp estradamen ádemi úılestik tapqan bir-eki halyq áni, Birjan sal men Aqan seriler­diń ánderi júrgende tipten ǵajap bolar edi-aý dep oılaǵanbyz. Solaı bolǵanda bul konsertti kórgen adam jalpy qazaq estra­dasynyń syr-sıpatyn, ózindik dara­ly­ǵyn, ulttyq naqyshtaryn tereńdep tanı túser edi-aý degenbiz. Iá, qazaq estra­dasynyń eshkimge uqsamaıtyn óz bet-beınesi, óz repertýary bolǵany maqul. Osy jaıdy alda eskere júrsek, quba-qup.
Qoryta aıtqanda, júrgenevtik ónerpaz órenderdiń Máskeýdegi konserti asa bıik óreden tabyldy. Sheteldermen mádenı yntymaq ortalyǵynyń festıvaldyq-konserttik bóliminiń bastyǵy Inna Shaveleva: «Osy konsertten-aq Qazaqstan­nyń arshyndy adymdarmen damyp otyr­ǵanyn kóremiz de sezemiz. Sizderdiń jas­taryńyz óte daryndy. Sonymen birge, tár­bıe-ádebi de ǵajap. Tehnıkalyq ja­raq­tanýy, bári qurmetke laıyq. Qazaq­stannyń jas ánshilerin, olardyń darqan daýystaryn aıtsańyzshy. Osyndaı keń tynysty kúshti daýysty qazaq eliniń tabıǵaty, ulan-baıtaq ushan dalasy syıǵa tartqan bolar. Men ózim jumys babynda Qazaqstanda jıi bolyp turamyn. Qazaq halqyn qurmetteımin», dep aıtqan rııasyz sózderi zal toly barsha qaýymnyń kóńil kúıin bildirgendeı edi.
Uzaq qol shapalaqtaý ústinde Qazaq­stannyń jas daryndarynyń qurmetine sahnaǵa Reseı Mádenıet mınıstrliginiń jáne Reseı federasııasyndaǵy Qazaqstan elshiliginiń yqylas gúlderi qoıyldy. Al júrekterdegi yqylas budan da zor dep bildik.
Qorǵanbek AMANJOL,
«Egemen Qazaqstan».
Almaty – Máskeý – Almaty.