Oblystyq ishki saıasat basqarmasy janyndaǵy Azamattyq ortalyqtyń basshysy Áıgerim Dosqalıevanyń aıtýynsha, aımaqta kóp balaly, jalǵyzbasty, múgedek bala tárbıelep otyrǵan jáne áleýmettik álsiz toptaǵy analardy qoldaýǵa baǵyttalǵan shara negizinde áıelderdi qysqa merzimdi kýrstar arqyly jańa mamandyqqa tegin oqytý kózdelip otyr.
-Kýrstardy Azamattyq ortalyqtyń mamandary ázirledi. Bizdiń maqsatymyz – áıelderdi kásipkerlik negizderine oqytý, sol arqyly óz isterin bastap, ómirlik maqsattaryn aıqyndaýǵa, ary qaraı damýlaryna qoldaý kórsetý. Oqý merziminiń uzaqtyǵy - bir aptadan bir aıǵa deıin, - deıdi Áıgerim Dosqalıeva. –Qazir úsh topta oqý bastaldy, 30 adamdy qamtyp otyr. Qatysýshylar negizinen tiginshilikke jáne aspaz-kondıter, vızajıst mamandyqtaryna qyzyǵýshylyq tanytýda.
Oqý kýrstary shashtaraz isi, manıkıýr, vızaj, emdik massaj, býhgalterııa, ınternet-saýda daǵdylary, SMM sekildi basqa da mamandyqtardy qamtıdy. Jańa kásip úırenýge qadam jasaǵandar qatarynda kóp balaly ana Álııa Tájenova da bar. Bala kútimine baılanysty demalysta otyrǵan Álııa ýaqytyn tıimdi paıdalanyp, vızajıst-stılıst mamandyǵyna oqyp jatyr. «Úıde jumyssyz otyrǵan analar úshin bul jaqsy múmkindik. Sulýlyq áleminiń syrlaryn úırenip alǵannan keıin óz isimdi bastaý maqsatymda bar. Búginde memleket tarapynan kóp balaly analardy qoldaýǵa baǵyttalǵan sharalar qatary artyp keledi. Osy múmkindikti paıdalanýymyz kerek»,-deıdi Álııa Tájenova.
Uıymdastyrýshylar joba qatysýshylarynyń arasynda belsendilik tanytqandarǵa arnaıy grant qarastyrylatynyn da aıtady.
ATYRAÝ
