Temeki shegetin adamdardy onyń zııany týraly aqparattandyrý sharanyń basty maqsaty etip alyndy. Volonterler kóshege shyǵyp, temeki shegetinderge bir almany bir tal temekige aıyrbastady. Olar osy arqyly rýdnyılyqtarǵa paıdaly iske kóshýdiń durystyǵyn kórsetti. Almanyń ókpe aýrýyna qarsy turatyn qasıeti bar ekenin ekiniń biri bile bermeýi múmkin. Aptasyna eki alma jep otyrsa da ókpe aýrýyna kómegi bolatynyn ǵalymdar dáleldegen. Jemistiń bul túri shylymshylarǵa zııandy ádetti tastaýǵa da kómektesedi eken. Bul qyzyqty da paıdaly aksııanyń bastamashysy Rýdnyı qalalyq polısııa basqarmasynyń bastyǵy, polısııa polkovnıgi Álim Bajyqbaevtyń ózi edi.
«Aksııaǵa kóshede otyz shaqty adam qatysty. Kezdeskenniń barlyǵy da shylymshy bolyp shyqty. Biraq olardyń kózqarasy ártúrli boldy. Bireýleri almaǵa bir tal shylymyn da qımaı qaldy, al keıbir kisiler qaltasyndaǵy «ýdy» qorabymen qolymyzǵa bere saldy» deıdi volonter Marııa Zıývanova.
Mamandar statıstıkasy boıynsha, Qazaqstanda jyl saıyn shylymnan 25 myń ólim tirkeledi eken. Shylym rak aýrýynyń kóptegen túrleriniń sebebine aınalady. Rýdnyılyq jastar jınaǵan temekiniń kózin joıdy.
Názıra Járimbet,
«Egemen Qazaqstan»
Qostanaı
