Ulystyń uly kúni Almatylyqtardy dýmanǵa bólegen aıryqsha keshtiń ataýynda aıtylyp turǵandaı, konsertte halqymyzdyń injý-marjan murasyndaǵy jaýhar shyǵarmalarǵa balanatyn ásem ánder oryndaldy. Kómeıine bulbul uıalaǵan dástúrli ánshiler kórermendi óz ónerimen baýrady.
«Táýelsizdiktiń arqasynda dástúrli ónerimizge degen betburys jyldan-jylǵa artyp keledi. Búgin shyrqalǵan ánderdiń árbiriniń ózine tán tarıhy bar. Qazaqtyń ulttyq ónerin ulyqtap kelgen aǵaıyndy kórip ishimiz jylyp qaldy. Qazaq barda qazaqtyń áni ólmeıdi», – deıdi dástúrli ánshi Jasulan Musaǵalı.
Konsertte Birjan Sal, Aqan Seri, Qapez, Súıinbaı men Qaban jyraý sekildi ult óneriniń aldaspandarynyń áıgili ánderi men termeleri shyrqaldy.
«Mundaı dástúrli áýender aıtylatyn án keshteriniń jıi ótip turǵany jaqsy ǵoı. Janymyz jasaryp, kóńilimiz sergip qaldy. Bul ánder qazaqtyń dalasy sııaqty salqar. Keýdemiz keńeıip, myń jasaǵandaı kúı keshtik»,-deıdi óner jármeńkesin tamashalaýǵa kelgen Almatylyq Baqytjan Zamanbekov.
Arman OKTIаBR,
«Egemen Qzaqstan»
ALMATY
