Bank tonaý men bankomat buzý Tarazda túk qıyndyǵy joq tirlik bolyp barady
Sársenbi, 12 jeltoqsan 2012 7:29
Tártip saqshylary 18 mıllıon 500 myń teńgeniń urlanýyna, eń aldymen, bank dırektorlary kináli dep otyr.
Taraz qalasy qaraqshylarynyń aty buryn baı-baǵylandardy bopsalap, aqsha tabýmen shyqsa, endi olar óz «sheberlikterin» basqa baǵytta synap kórmekke bel býǵan syńaıly. Búginde olar úshin bank tonaý, bank ınkassatorlaryna shabýyl jasaý jáne bankomattardy buzyp, ondaǵy qyrýar qarjyny bir sátte úptep ketý túk te emes.
Sársenbi, 12 jeltoqsan 2012 7:29
Tártip saqshylary 18 mıllıon 500 myń teńgeniń urlanýyna, eń aldymen, bank dırektorlary kináli dep otyr.
Taraz qalasy qaraqshylarynyń aty buryn baı-baǵylandardy bopsalap, aqsha tabýmen shyqsa, endi olar óz «sheberlikterin» basqa baǵytta synap kórmekke bel býǵan syńaıly. Búginde olar úshin bank tonaý, bank ınkassatorlaryna shabýyl jasaý jáne bankomattardy buzyp, ondaǵy qyrýar qarjyny bir sátte úptep ketý túk te emes.
Qaraqshylardyń alǵashqy shabýyly qaısybir jyldary «Temirbanktiń» Taraz qalalyq fılıaly ınkassatorlaryn qorqytyp-úrkitip, olardan qyrýar qarjyny tartyp alyp ketýden bastalǵan. Osyndaı qorqaýlardyń qolynan Merki aýdanynyń aýmaǵynda birneshe ınkassatorlardyń jazyqsyzdan kóz jumǵany da belgili. Al bıyl kóktemde oblys ortalyǵyndaǵy aqsha aıyrbastaý pýnktiniń ınkassatorynyń izine túsip, onyń kelip-ketetin ýaqytyn bilip alǵan qaraqshylar qyzmetkerdi basynan kespeltek temirmen uryp, taldyryp túsirgen de, qolyndaǵy 100 myń AQSh dollary men 8 mıllıon teńge salynǵan sómkesin tartyp alyp ketken.
Jaman ádet te juqpaly aýrý sııaqty, tez taraıdy. Endi, mine, attary dardaı «Halyq banki», «Evrazııa banki» jáne «ATF Bank» degen qarjy mekemeleriniń Taraz qalalyq fılıaldarynyń dırektorlary sandaryn soǵyp otyr. Naqtyraq aıtsaq, №8 shaǵyn aýdandaǵy №2 úıge ornalasqan «Septer» fırmasynyń zalyna qoıylǵan bankomattardy belgisiz bireýler tún ortasynda talqandap, ondaǵy 18 mıllıon 500 myń teńgeni urlap ketken.
Oblystyq IID qylmystyq polısııasy basqarmasynyń bólim bastyǵy Ábdiqadir Nazarovtyń aıtýynsha, bir emes, baqandaı 4 bankomat qoıylǵan zalda ne dabyl qaqqysh, ne beıne-baqylaý júıeleri bolmaǵan. Eń soraqysy, tipti, bul jerde eki aıdan beri qarý asynǵan qaraýyl da tóbe kórsetpepti. Sonda buǵan kináli kim? Árıne, eń aldymen, belgili bankterdiń Taraz fılıalynyń dırektorlary. Áıtpese, munshama qarjyny dalaǵa laqtyra salǵandaı, qaraýyly joq, baqylaý júıesi ornatylmaǵan jerde turǵan bankomattarǵa qalaı kózderi qıyp salyp qoıady.
Halqymyzda: «Shyǵasyǵa ıesi basshy», degen sóz bar. «Qazannan qaqpaq ketse, ıtten uıat ketedi», degenderi de aqıqat. Sondyqtan, bul jerde úlken somanyń qoldy bolýyna atalmysh bank fılıaldary dırektorlarynyń saldyr-salaqtyǵy sebep bolǵan demeske laj joq.
Kósemáli SÁTTIBAIULY,
«Egemen Qazaqstan».
Taraz.
