Is-sharaǵa SDÝ prezıdenti Meıirbek Májıtov jáne úzdiksiz kásibı damý Bıýrosynyń atqarýshy dırektory Ernur Rysmaǵambetov, sondaı-aq ýnıversıtet Bıznes mektebiniń professorlyq-oqytýshylyq quramy qatysty. Memorandýmǵa qol qoıý barysynda AHQO qoldaýymen SDÝ bazasynda AIFC BCPD FinLab qarjylyq zerthanasynyń saltanatty ashylýy ótti. Is-sharaǵa qatysýshylardy quttyqtaı otyryp, SDÝ prezıdenti Meıirbek Májıtov akademııalyq sektordyń ındýstrııamen qarym-qatynasyn nyǵaıtýdyń mańyzdylyǵyn atap ótti.
- Maman daıarlaýda ındýstrııa ókilderimen, kásiporyndardyń ıeleri jáne basshylarymen keri baılanys ornatý budan bylaı ýnıversıtettiń qarqyndy damýynyń mańyzdy bóligi bolyp tabylady. Búgingi tańda kúsh-jigerdi halyqaralyq standarttar ári jumys berýshiler men kásibı naryq qatysýshylarynyń naqty qajettilikteri jaǵyna shoǵyrlandyrý, sol arqyly halyqaralyq tájirıbeni otandyq tájirıbemen yqpaldastyrý óte mańyzdy. Bilim berý salasyndaǵy álemdik tájirıbe osy úlginiń tıimdiligin jáne ýnıversıtettiń eldiń ekonomıkalyq, áleýmettik jáne qoǵamdyq ómirine qatysý qajettiligin kórsetip otyr. Osy rette AHQO bizge senimdi seriktes bolýy óte mańyzdy. Bul zerthana - bizdiń stýdentterge qosymsha serpin berip, qarjy jáne ınvestısııa salasynda jańa tanymdardy meńgerýge kómektesedi, sondaı-aq halyqaralyq deńgeıdegi kásibı maman bolyp qalyptasýyna jol ashady dep senemin, - degen pikirde SDÝ prezıdenti Meıirbek Májıtov.
Aldaǵy ýaqytta taraptar bank qyzmeti, kapıtal naryǵy, aktıvterdi basqarý, qarjy tehnologııalary jáne adamı kapıtaldy damytý salasynda kadrlardy kásibı daıarlaý men biliktilik salasyndaǵy seriktestikti nyǵaıtýdy josparlap otyr. Atap aıtqanda: qonaq leksııalary, tájirıbe jáne aqparat almasý, ózara qyzyǵýshylyq týdyratyn salalarda joǵary bilikti mamandar men ǵylymı-pedagogıkalyq kadrlardy daıarlaý úshin oqytý trenıngterin ótkizý, AHQO men SDÝ bazasynda ekijaqty seriktester ókilderin shaqyrý, kásibı bilim men quzyrettilikti damytýdyń birlesken ortalyǵyn ashý, álemniń tanymal qarjygerleriniń qatysýymen kezdesýler men ǵylymı is-sharalardy uıymdastyrý. Sonymen qatar bakalavrıat jáne magıstratýra mamandyqtary aıasynda "FRM", "HRCI", "ERP" jáne basqa da halyqaralyq sertıfıkattaý baǵyttary boıynsha eksperımenttik bilim berý baǵdarlamalaryn ázirleý jáne engizý josparlanýda. Osylaısha, aldaǵy ýaqytta bakalavrıat, magıstratýra jáne doktorantýra baǵdarlamalary boıynsha oqıtyn SDÝ stýdentterine AHQO bazasynda kásiptik, oqý-óndiristik tájirıbeler men ǵylymı-zertteý taǵylymdamalardan ótý qamtamasyz etiledi.
Esterińizge sala keteıik, úzdiksiz kásibı damý bıýrosy kadrlyq jáne mansaptyq máselelerde uzaq merzimdi aralyqta qarjy ortalyǵynyń básekelestik artyqshylyǵyn qurý jáne qoldaý maqsatynda Halyqaralyq qarjy ortalyǵynyń alǵashqy qurylymdyq bólimsheleriniń biri bolyp óz jumysyn bastaǵan. Onyń mindeti qarjy naryǵynyń jergilikti mamandarynyń kadrlyq áleýetin damytý, halyqaralyq kásibı sertıfıkattaýdy nasıhattaý, AHQO eko-júıesinde jáne odan tys jerlerde odan ári jumys isteý úshin halyqaralyq deńgeıde kásibı mamandardyń kadrlyq rezervin qurý bolyp tabylady.
