- Menińshe, maýsym biz úshin sátti ótti. Bul bas bapker retindegi alǵashqy maýsymym, sol sebepti, aldyma qoıǵan mindetterdi oryndaı aldym. Dálel retinde tórt birdeı el rekordynyń jańartylýyn aıtar em. Onyń ekeýi Ekaterına Aıdovanyń enshisinde. Al Dmıtrıı Morozov, Demıan Gavrılov pen Vıtalıı Shıgolevter komandalyq synda rekordqa qol jetkizdi.
Maýsymdaǵy sońǵy kezeńde Dmıtrıı Morozov 10 shaqyrymdyq básekede el rekordyna túzetý engizdi. Aıtpaqshy, ol meniń 2013 jyly ornatqan rekordymdy buzǵanyn eskerý kerek.
Barlyq sportshylar jarady. Maýsym boıy qıyndyqtarǵa qaramastan, sátti óner kórsetti. Olardyń kópshiligi úshin bul eresekter arasyndaǵy alǵashqy maýsym edi. Sondyqtan, álemniń úzdik sportshylarymen bir qatarda jarysý ońaı bolmaǵany anyq.
Kelesi jyly ótetin álem kýbogi kezeńderinde 1500 metr jáne 5 shaqyrymdyq jarysqa qatysý úshin taǵy qosymsha eki oryn utyp aldyq. Osylaısha, halyqaralyq syndarǵa qatysatyn bizdiń komanda quramy taǵy da ulǵaıa túspek. Negizi, bul ótken maýsymǵa qoıylǵan basty mindet bolatyn. Alaıda, kóptegen faktorlar, ásirese, jaraqat alý qaýpi keri áserin tıgizdi.
Máselen, Ekaterına Aıdova búkil maýsym boıy tizesindegi jaraqatyna qaramastan aıdynǵa shyqty. Álem kýbogi kezeńderiniń fınalynda ol naǵyz babynda edi. О́ziniń rekordyn jańartty, dese de, budan úlken kórsetkishke qol jetkizý múmkindigi bar onyń. Keıin Kanadanyń ashyq kýboginde 1500 metrde top jaryp, Qazaqstan rekordyna ózgertý engizdi.
- Siz ulttyq qurama tizginin byltyr aldyńyz. Komandany damytyp, nátıjeni jaqsartý úshin ýaqyt jetkilikti boldy ma?
- Biz alǵashqy jarystardan keıin-aq ózimizge ne qajet ekenin túsine bastadyq. Búginde olqy tustarymyzdy jetildirip, aldaǵy maýsymǵa jospar qurýdamyz. Bizge ósý kerek, damý kerek. Maýsym ótken saıyn damı túsip, medal úshin básekelese alatyn jaǵdaıǵa jetý qajet. Árbir týrnırden soń jattyǵý kezeńin saralap, nátıjeni meıilinshe joǵarylatý úshin eńbektendik. Ázirge bul mindetimizdi oıdaǵydaı atqaryp kelemiz.
- Aıdova úshin bıylǵy jyl sátti ótti dep aıta alasyz ba?
- Aqpan aıynda Gollandııada ótken sprınterler arasyndaǵy álem chempıonatynda Aıdova olımpıada júldegerlerin basyp ozyp, 5-shi orynǵa turaqtady. Al 1000 metrlik synda qola júlde alý úshin oǵan 0,8 sekýnd jetpeı qaldy. Bıylǵy besinshi orynnyń quny joǵary. О́ıtkeni, Katıa jyldamdyqty arttyrdy. Bul kelesi maýsymǵa jaqsy kóńil-kúımen daıyndalýǵa serpin beredi.
- Dmıtrıı, komandadaǵy rezerv máselesi týraly ne aıtasyz? Kóshbasshylardyń izin basatyn jastar jaǵy iri dodalarǵa daıyn ba?
- Jaqynda ǵana bapkerlermen keńes ótkizip, komanda quramy týraly sóz qozǵadyq. Ázirge, ulttyq quramada jańa esimder joq. Komanda qataryna qosylatyn jastardyń aldyndaǵy maqsat basqa bolmaq. Eresekter arasyndaǵy týrnırlerge qatysý úshin olarǵa belgili bir ýaqytsha lımıtti oryndaý qajet. Osy turǵydan jumys isteımiz.
Degenmen, komanda quramanyń jańaratyny sózsiz. Alda Azııa oıyndary men Olımpıada kele jatyr. Sol sebepti, komandany jasartýdan bas tartpaımyz. Búginde UOK jáne Federasııa tarapynan qajetti qoldaýdy sezip otyrmyz. Sondyqtan, tek alǵa basamyz.
