Qazaqstan Respýblıkasy Úkimetiniń Qaýlysymen Áset Maratuly Maǵaýov QR energetıka vıse-mınıstri qyzmetine taǵaıyndaldy. B. Aqsholaqov berilgen ótinishine sáıkes laýazymynan bosatyldy.
Á. Maǵaýov 1972 jyly Atyraý oblysynyń Qulsary aýylynda dúnıege kelgen. I. M. Gýbkın atyndaǵy Máskeý munaı hımııasy jáne gaz ónerkásibi ınstıtýtyn támamdaǵan, Halyqaralyq Valıýta Qorynda jáne Azııa Damý Bankinde taǵylymdamadan ótken. Eńbek jolyn 1994 jyly bastaǵan. Ártúrli jyldary «Teńizmunaıgaz» AQ, «Qazaqoıl» JAQ, «Munaı jáne gaz tasymaldaý» UK» AQ, «QazMunaıGaz» AQ, «Teńizshevroıl» JShS, «Mańǵystaýmunaıgaz» AQ jumys istegen. 2008–2010 jyldary — QR energetıka jáne mıneraldy resýrstar vıse-mınıstri; 2010–2011 jyldary — QR munaı jáne gaz vıse-mınıstri. 2017 jylǵy jeltoqsannan bastap KAZENERGY qaýymdastyǵynyń bas dırektory laýazymyn atqarǵan.
Sonymen qatar, Qazaqstan Respýblıkasy Úkimetiniń Qaýlysymen Mádına Erasylqyzy Ábilqasymova basqa jumysqa aýysýyna baılanysty QR ulttyq ekonomıka birinshi vıse-mınıstri qyzmetinen bosatyldy.
QR mádenıet jáne sport mınıstriniń buıryǵymen Qýat Qaharmanuly Borash Til saıasaty komıtetiniń tóraǵasy qyzmetinen bosatyldy.
