Ashyq lıýkter máselesi qala ákimdiginiń turaqty baqylaýynda: paıdalanýshy uıymdar ótinimderge baılanysty kún saıyn ashyq qudyqtardy anyqtaý jáne joıý boıynsha jumystar júrgizýde.
Búgingi kúni barlyq ótinimder tıesili balans ustaýshylarmen pysyqtaldy.
Káriz qudyqtarynyń ashyq qalmaýy úshin jáne apattyń aldyn alý úshin ákimdik kelesi jumystardy atqarýda: qudyqtardy tolyq túgendeý júrgiziledi, jobalanatyn jobalarda polımerlik materıaldan jasalǵan lıýkterdi ornatý qarastyrylady.
Sonymen qatar, qoldanystaǵy qudyqtarǵa temir tor ornatylýda, ol eger qudyq qaqpaǵyn urlap ketse de adamnyń, jan-janýardyń, taǵy da basqa materıaldyń qudyq ishine túsip ketýin saqtaıdy. Qazirgi kúni temir tor 11 myńnan astam qudyqqa ornatylǵan.
Jáne de balansta qudyqtary bar mekemeler qudyqtardy jabý boıynsha jumystar júrgizýde.
28 naýryzdaǵy jaǵdaı boıynsha barlyq aýdandarda 11 538 dánekerlengen torlar ornatylǵan, sonyń ishinde «Astana-AEK» AQ - 246, «Astana-Teplotranzıt» AQ - 8 121, «Astana sý arnasy» - 807 dana qorǵaǵysh torlar ornatqan.
Sonymen qatar, qalalyq polısııa departamenti qudyq qaqpaqtaryn urlaýdyń aldyn alý boıynsha únemi jedel-reıdtik is-sharalar, eskertý jáne jolyn kesý boıynsha jumystar júrgizedi.
Polıseıler memlekettik kirister departamentiniń ókilderimen birlesip metall synyqtaryn qabyldaıtyn oryndarda tekserý boıynsha aýqymdy is-sharalar júrgizedi.
Turǵyndarmen eseptik kezdesý barysynda qala ákimi Baqyt Sultanov qudyq qaqpaqtaryn urlaý «astananyń aýrýy» degen bolatyn. Onyń sózinshe, ótken jyldyń kúzinen bastap kommýnaldyq sala qyzmetkerleri myńdaǵan ashyq qudyqtardy anyqtaǵan.
Adamdardyń qaýipsizdigi jáne qaıǵyly jaǵdaıdy boldyrmaý úshin qala ákimi qudyqtardy únemi tekserip, olarǵa temir torlar ornatýdy tapsyrǵan bolatyn.
