«Birinshiden, Áýe qorǵanysy kúshteri atynan 13 jigitimizdiń otbasylaryna kóńil aıtamyn. Qaıǵymyzda shek joq. 27 naýryz kúni Astana ýaqyty boıynsha 18.20-18.30 mınýt arasynda bizdiń tórt tikushaq Aqtaý qalasynan Shymkentke ushyp kele jatqan kezde Jalaǵash aýylynyń mańynda olardyń biri apatqa ushyrady. Bul apatta tikushaqtyń úsh ushqyshy jáne on sarbazymyz qaza boldy. Atalmysh áýe kemesinde bizdiń maıor Roman Kostygov komandır boldy. Ol 2-synyp ushqyshy. Apat jaıly estigen kezde sol kúni memlekettik komıssııa Qyzylorda oblysynyń áýejaıyna ushyp shyqty. Qazirge deıin 9 jigitti týǵan jerine jerledik. Búgingi tańda gendik saraptama elordada ótkizilip jatyr. Tórt jigitti (denesin) búgin týǵan jerine jetkizemiz dep oılaımyn», - dedi Dáýren Qosanov.
Aıta ketsek, Qyzylorda oblysynda tikushaq apatynan qaza tapqan 9 áskerı qyzmetshiniń denesi jer qoınyna berildi. Qalǵan tórteýiniń múrdesi týǵan jerlerine búgin jetkiziledi.
Sonymen qatar, apatqa ushyraǵan Mı-8 tikushaǵynyń ekıpajy áýe kemesin sharýa qojalyǵynyń ústine qulaýyna jol bermegendigin de atap ótti.
«Men apat oryn bolǵan jerge birinshi jettim. Alǵashqyda kórgenim tikushaq bólikteriniń jan-jaqqa shashyrap ketkeni boldy. Kýáger aýyl turǵynynyń aıtýynsha, «tikushaq týra ústinen ushyp ótip baryp, qulaǵan. Bul ekıpajdyń sońyna deıin kúreskenin dáleldeıdi. Sharýa qojalyǵy zardap shekpes úshin tikushaqty basqa jaqqa buryp áketken. Men 13 jigit te - batyr dep esepteımin», - dedi Áskerı-áýe kúshteriniń qolbasshysy.
Eske salaıyq, 27 naýryz kúni keshke Qyzylorda oblysynyń Jalaǵash aýdanynda MI-8 tikushaǵy apatqa ushyrady. Qorǵanys mınıstrliginiń aqparatyna sáıkes, atalǵan tikushaq Aqtaý qalasynan Shymkentke bet alǵan 4 áskerı tikushaq quramynda bolǵan. Barlyq ekıpaj múshesi - 13 adam qaza tapty. Osyǵan deıin Qorǵanys mınıstrligi kóz jumǵan áskerı qyzmetshilerdiń esimderi men fotosýretterin jarııalaǵan bolatyn.
