– Semeıge arnaıy kelip synǵa túsken «Shyǵys», «Batys» jáne «Ońtústik» óńirlik qolbasshylyqtarynan 120-dan astam áskerı qyzmetshi, ıaǵnı 5 mınomet batareıalary jarystyń úsh kezeńinde ózderiniń teorııalyq bilimderi men tájirıbelik daǵdylaryn kórsetý úshin irikteldi, – dedi «Shyǵys» óńirlik qolbasshylyǵy baspasóz qyzmetiniń jetekshisi, aǵa leıtenant Islambek Qaldybekov, – birinshi kezeń – «Atys» boıynsha, batareıalar jalpy komandalyq nátıjemen eń kóp ball jınaıtyn batareıany anyqtaý úshin AK-74-ten 4 baqylaý atý jattyǵýlaryn oryndady. Ekinshi kezeń «Arnaıy» dep ataldy. Áskerı qyzmetshiler arnaıy daıyndyq boıynsha ózderiniń bilimderin kórsetti. Bólimshe quramynda jáne jeke óz mamandyqtary boıynsha synaqtar men normatıvterdi tapsyrdy. Úshinshi kezeń «Batareıanyń atýy» dep ataldy. Jarystyń bul kezeńinde jeke quramnyń áreketin soǵys jaǵdaıyna maksımaldy jaqyndatý úshin jeńil brondalǵan kóp maqsatty tartqyshynda (MTLB) ot pozısııasyn aýystyra otyryp nysanalardy ártúrli qashyqtyqtan mınometten kózdep atýdan synǵa tústi.
Jarys qorytyndysy boıynsha birinshi orynǵa «Shyǵys» óńirlik qolbasshylyǵynyń 27943 áskerı bóliminiń mınomet batareıasy, ekinshi orynǵa «Ońtústik» óńirlik qolbasshylyǵynyń 74884 áskerı bóliminiń mınomet batareıasy, úshinshi orynǵa «Batys» óńirlik qolbasshylyǵynyń 30238 áskerı bóliminiń mınomet batareıasy laıyqty boldy.
Raýshan NUǴMANBEK,
«Egemen Qazaqstan»
SEMEI
