Búgin Nur-Sultandaǵy Lev Gýmılev atyndaǵy Eýrazııa Ulttyq ýnıversıtetinde shahmattan Dınara Sádýaqasovanyń kýbogy úshin jarys bastaldy.
«Jastar jylyna» arnalǵan týrnırdiń júlde qory 1,5 mıllıon teńgeni quraıdy. Ol eki kúnge sozylady. Bul básekelerde respýblıkamyzdyń barlyq óńirinen kelgen 110 stýdent baq synaýda. Erler arasynda 1-10 jáne áıelder saıysynda 1-7 oryndardy ıelengen oıynshylar dıplom jáne medaldarmen qosa, aqshalaı syılyqtarmen marapattalady.
– Biz jyl saıyn stýdentter arasynda týrnır ótkizip turamyz. Ol jastar úshin óte qajet. Osyndaı jarystar arqyly olardyń sheberligi shyndalady, tájirıbe jınaıdy. Bıylǵy dodaǵa 110-nan asa oıynshylardyń jınalǵanyn estip, qatty qýandym. Osy týrnırde baq synap jatqandar arasynan keleshekte myqty shahmatshylar shyǵatynyna kámil senemin, – deıdi ataqty shahmatshy Dınara Sádýaqasova.
