«Komanda kún saıyn alǵa basyp keledi. Qazirgi tańda jattyǵý qarqynyn údetip, kemshilikterdi joıýǵa tyrysýdamyz. Federasııa Reseıdiń úzdik komandalarymen birlesken jattyǵý jıynyn ótkizýdi qolǵa alyp jatyr. Sondaı-aq, halyqaralyq ashyq týrnırlerde baq synaýdy josparlap otyrmyz. Jaqyn arada komanda sapyndaǵy ózgeristerden de habardar bolasyzdar», - deıdi bas bapker.
Marına Pıkalova Tokıo oıyndaryna joldama taratatyn eki mańyzdy týrnırge de toqtalyp ótti.
«Bıylǵy maýsymda eki iri doda kútip tur. Onyń biri – qyrkúıek aıynda Qytaıda ótetin Azııa chempıonaty. Ekinshisi – jeltoqsan aıynda Japonııada uıymdastyrylatyn álem birinshiligi. Árıne, Olımpıada oıyndaryna irikteý týrnıri sanalatyn Azııa chempıonatyna bar kúshimizdi salamyz. Olımpıada lısenzııasy halyqaralyq irikteý týrnırlerinde top jarǵan alty komandaǵa, jazǵy oıyndardy qabyldaıtyn memleketke jáne álem chempıonatynda kózge túsken tórt qurlyqtyń úzdik quramalaryna beriledi», - deıdi Pıkalova.
Komandanyń bas bapkeri Tokıo oıyndaryna lısenzııa alý úshin sportshylardyń aıanyp qalmaıtynyn eskertip, joldama taratatyn týrnırlerge daıyndyq bastalyp ketkenin de habarlady.
