Tórtkúl dúnıe túgel kóz tikken baıraqty básekelerde qazaq boksshylarynyń bási qashanda joǵary. Jıyrmasynshy ǵasyrdy tarıh qoınyna attandyrardan alty aı buryn álem nazaryn aýdaryp, jasyl qurlyqta alaýy tutanǵan Sıdneı olımpıadasy jurtshylyqtyń esinde. Aıtýly dodada el sportshylary enshilegen 7 medaldyń tórteýin bolat qoldy boksshylar alyp bergen edi. Bekzat Sattarhanov pen Ermahan Ybyraıymov altynnan alqa taǵynsa, Bolat Jumadilov pen Muhtarhan Dildábekov qorjynymyzǵa Olımpııa oıyndarynyń kúmis medalin saldy. Nurjan Káribjanov, Danııar Muńaıtpasov, Oljas Orazalıev syndy oǵlandarymyz da júldege synyq súıem qalǵanda ǵana súrinip, besinshi orynǵa taban tiregen edi.
Alǵa dep urandaǵan el sharshy alańdy shańdatqan jampoz uldarynyń tileýin kógildir ekran aldynda otyryp jamyraı tiledi. Kók baıraǵymyz kókke kóterilgenin kórgende jan ushyra qýandy. Al olardy Almaty áýejaıynan qarsy alýǵa asyqqan aqedil aǵaıynnyń aqjarma kóńili tipti bólek. Osy qýanyshtyń ortasynda bolǵan fotojýrnalıst kóńil tórinde qalǵan sol bir mereıli sátti bylaısha baıandady.
– Sıdneı bizdiń egemen el retinde qatysqan ekinshi olımpıadamyz. Tún jarymyna qaramastan dańqty sportshylardy áýejaıdan kútip alýǵa halyq kóp jınaldy. Kóptiń ishinde biz de boldyq. Fototilshi retinde osynaý tarıhı sátti túsirýdiń oraıy kelgen edi. Qoldaryna boksshylardyń esimi jazylǵan plakattar ustaǵan jankúıerler qýanysh ıeleriniń qushaǵyn gúlge toltyryp jatty. Jıylǵandardyń nebári jıyrma jasynda Olımp shyńyn baǵyndyrǵan túrkistandyq Bekzat Sattarhanovqa degen yqylasy erekshe baıqalyp turdy, – deıdi Asylhan Ábdiraıymuly.
Odan beri de jıyrma jylǵa jýyq ýaqyt ótti. Qazaq boksshylary jeńispen órilgen dańqty jolǵa daq túsirgen joq. Búgingi tańda Sıdneıde aıbarymyzdy aspandatqan sańlaqtar bolashaq chempıondardy baýlysa, olardyń keıbiri qazaq sportynyń damýyna ózindik úlesin qosyp júr. О́zegimizdi órtteıtini aramyzda Bekzat Sattarhanov joq. Aldaǵy josparyńyz qandaı dep suraq qoıǵan tilshiler qaýymyna: «Armanym – úsh dúrkin Olımpıada chempıony bolý» dep ún qatqan órimdeı ul qalyń qazaqtyń qabyrǵasyn qaıystyryp kete bardy. Búgin jasyndaı jarq etken jaryq juldyzymyzdyń esimi qazaq tarıhyna altyn árippen jazylyp, halqynyń máńgilik saǵynyshyna aınalǵan Bekzatymyzdyń týǵan kúni.
ALMATY
