Búgin, ıaǵnı 8 sáýir kúni ákimdikte ótken apparattyq jıynda iKOMEK109 qalalyq monıtorıng jáne jedel áreket etý ortalyǵy qala aktıvine Qazaqstandaǵy alǵashqy ınnovasııalyq tásil – Qalalyq akselerator jobasyn tanystyrdy. Onyń kómegimen qalalyq bılik qalanyń júıeli túıtkilderin elorda tynys-tirshiliginiń kez kelgen máselelerine (qoǵamdyq kólik, qurylys, abattandyrý, bilim, densaýlyq saqtaý jáne t.b.) qatysty 100 kún ishinde sheshýge ýáde berip otyr.
Aıtyp ótetin jaıt, bul jańa bólimshe, tipti jańa kompanııa emes, bul buǵan deıin iKOMEK109 qalalyq ortalyǵy aıasynda qurylǵan Nur-Sultan qalasy ákimdigi Joba keńsesiniń jańa fýnksııasy.
Qalalyq akselerator Rapid Results Institute (RRI) ádisnamasyna negizdelgen. RRI – 2007 jyldan bastap jumys isteıtin, kúrdeli áleýmettik túıtkilder sheshimderi men nátıjelerge qol jetkizýdiń iske asyrylýyn qoldaý boıynsha halyqaralyq uıym. RRI jobalardy BAÁ, AQSh, Ulybrıtanııa, Irak, Iordanııa, Nepalda, Kenııada tabysty iske asyrýda.
Elimizdegi alǵashqy elordalyq qalalyq damý akseleratory shuǵyl merzim ishinde qala damýynyń basty máseleleri boıynsha jumys tetikterin ázirleý jáne olardy synaý úshin ákimdiktiń basty qyzmetkerleri, syrtqy sarapshylar, belsendi azamattar tartyla otyryp, ákimniń orynbasarlary men ákim jetekshilik etetin shtab qurýǵa saıady. Jumys toby jobany ıdeıadan túbegeıli iske asyrǵansha jáne josparlanǵan nátıjege qol jetkizilgenshe súıemeldeıtin bolady.
Júıeli túıtkilderge monıtorıng júrgizýdegi negizgi quraldardyń biri elorda turǵyndarynyń iKOMEK 109 biryńǵaı baılanys ortalyǵynabaǵyttaǵan ótinishteri negizinde naqty ýaqyt tártibinde qurylǵan Qalanyń júıeli túıtkilderi reıtıngisiniń paneli. Bul Panel
Qalalyq damý akseleratory zertteıtin qalanyń júıeli túıtkilderi týraly derekkózderdiń biri. Búgingi tańda qalanyń eń kóp taralǵan túıtkilderi: ashyq qudyqtar,qańǵybas janýarlar, qoǵamdyq kólik, densaýlyq saqtaý, bilim, turǵyn úı, sý basý, qardy/ muzdy tazalaý, kóshe jaryǵy, jasyl jelekterdi kútip-ustaý, masany, shirkeılerdi joıý máseleleri.
Qalalyq damý akseleratorynyń ekinshi kezeńin osy jyldyń maýsymynda bastaý josparlanyp otyr. Ol sonymen qatar qalanyń basqa da júıeli túıtkilderin sheshýge baǵyttalatyn bolady. Qalalyq damý akseleratoryn qurý qysqa ýaqyt ishinde tıimdi sheshimder ázirleýge jáne jyldam nátıjege qol jetkizýge, sonymen qatar halyqty qalalyq túıtkilderdi sheshýge tartýǵa kómektesedi.
