Sáýir aıynyń basynan bastap 3 myńnan astam adam AÁK alýǵa ótinish bildirgen.
«Biz adamdardyń qarasy qalyń bolatynyn bilip, aldyn ala daıyndaldyq. 1 sáýirge deıin bizdiń 36 qyzmetker qaıta oqytyldy, qazir olar jumyspen qamtý ortalyǵynyń operasııalyq zalynda, sondaı-aq aýdandyq ákimdikterde adamdardy qabyldaıdy. Kópbalaly analarǵa jumyspen qamtý ortalyǵyna barý mindetti emes, jergilikti ákimdikke de júginýge bolady. Onda kezek az. Bul rette mamandar saýatty ári barynsha tez keńes beredi», – dedi halyqty jumyspen qamtý ortalyǵynyń baspasóz hatshysy Dana Turǵynova.
Qala turǵyndaryna yńǵaıly bolý úshin jumyspen qamtý ortalyǵy saǵat 8:30-dan 20:00-ge deıin túski úzilissiz jumys isteıdi.
«Qujattardy sáýir aıynda tapsyrýǵa bolady. Azamattardyń júgingen ýaqytyna qaramastan, ótinim rastalǵan jaǵdaıda olar tólemge qol jetkize alady. AÁK 1 sáýirden bastap taǵaıyndaldy», – dedi D. Turǵynova.
Sondaı-aq, ol qyzmetkerlerdiń keıbireýlerden qujattardyń tolyq paketin, al basqalardan tek jeke kýálikti talap etetinin túsindirdi.
«Eńbek jáne halyqty áleýmettik qorǵaý mınıstrligi «E-Halyq» jańa aqparattyq bazasyn iske qosty. Atalǵan aqparattyq bazada derekteri joq azamattardan qosymsha qujattar talap etiledi. Buryn AÁK alǵan azamattar jańa formattaǵy AÁK alýshylar qataryna avtomatty túrde kóshedi», – dep túsindirdi ol.
Qujattardy qabyldaǵannan keıin ýchaskelik komıssııa alǵash ótinish berýshilerdiń materıaldyq jaǵdaıyn tekseredi.
Esterińizge sala keteıik, 1 sáýirden bastap AÁK taǵaıyndaýdyń jańa krıterııleri anyqtaldy, oǵan sáıkes elorda turǵyndary úshin bir adamǵa 21 572 teńge kóleminde kedeılik shegi anyqtaldy. Tıisinshe, áleýmettik kómek alý úshin otbasynyń bir múshesine tabysy kedeılik sheginen aspaıtyn barlyq adamdar júgine alady.
