Búgin Baqyt Sultanovtyń tóraǵalyǵymen ótken ákimdiktegi kezekti otyrysta qala tirshiliginiń mańyzdy máseleleri talqylandy. Jıynda kóterilgen máselelerdiń eń negizgisi azyq-túlik baǵasyn turaqtandyrý taqyrybyna arnaldy.
«Men sizderge áleýmettik mańyzy bar azyq-túlik taýarlarynyń tizimine enbegen azyq-túlik baǵalarynyń ekonomıkalyq taldaýyn zerdeleýdi jáne olardy tómendetý jóninde naqty usynystar engizýdi tapsyrdym. Osy másele boıynsha jumysty bastadyńyzdar ma?» – dep surady qala ákimi óziniń orynbasary Malıka Bekturovadan.
«Mamyr aıynda ońtústik óńirlerden jańa pisken kókónister men jemisterdi jetkizý bastalady. Bul máseleni bazarmen ári tasymaldaýshylarmen aldyn ala pysyqtap, qajet bolsa, mınıstrlikterdi, ońtústik aımaqtardyń ákimdikterin qosyńyz. Sondaı-aq, baǵany maýsymdyq kóterý shyńynda turaqtandyrý qorynyń (kartop, sábiz, un) jumysyn jandandyrýdy tapsyramyn», – dedi ákim.
О́z kezeginde M.Bekturova keıbir kókónister men áleýmettik mańyzy bar azyq-túlikterge baǵany turaqtandyrý týraly shart talaptaryn daıyndaý boıynsha iri gıpermarketpen kelissózder júrgizilgenin habarlady. Elordanyń azyq-túlik beldeýin damytý maqsatynda AQMOL dúkender jelisi keńeıtilýde. Sáýir aıynyń sońyna deıin taǵy bir dúken ashylady dep kútilýde.
Qazir qalada osyndaı bes dúken jumys isteıdi. Mundaǵy baǵalar naryqtyq baǵadan 15%-ǵa tómen. Áleýmettik mańyzy bar ónimderdiń toǵyz túri osynda satylady. Osy aptada Astana ÁKK men AQMOL dúkenderi jelisi jeńildetilgen qaryz berý jónindegi shartqa qol qoıady dep kútilýde. «Qazir turaqtandyrý qorynda un, qant, kúrish, qaraqumyq, kartop, sábiz bar. Qazirgi ýaqytta «1000 oryn - kóshe saýdasy» baǵdarlamasy aıasynda turaqtandyrý qorynyń ónimderin satýǵa qatysty daıyndyq jumystaryn júrgizýdemiz. Osy aıdan bastap turaqtandyrý qorynyń ónimderi osy jeli arqyly satylatyn bolady. Dúkenderde nannyń baǵasy 75-80 teńgeden aspaıdy. Baǵanyń ósýine jol bermeý maqsatynda naýbaıhanalar men un tartatyn kásiporyndarmen memorandýmǵa qol qoıamyz», – dedi M.Bekturova.
Onyń aıtýynsha, mamyr aıynda qalalyq jármeńkeler óz jumysyn bastaıdy.
Budan ári jergilikti bıýdjettiń oryndalý barysy týraly ákim orynbasary Asqar Amrın baıandady. Onyń aıtýynsha, shyǵyndar boıynsha bıýdjet 98%-ǵa ıgerildi.
Otyrysta salyq túsimderi boıynsha jospardy júzege asyrý jóninde qalalyq departament basshysy Baýyrjan Aınabekov esep berdi.
Baqyt Sultanov buǵan deıin salalar men kásiporyndar boıynsha kameraldyq baqylaý josparyn ázirleý týraly tapsyrma berilgenin eske saldy. Osyǵan baılanysty Aınabekovke salalar men kásiporyndar bólinisinde kameraldyq baqylaý josparyn usyný, qolma-qol aqshasyz esep aıyrysý úshin kassalyq apparattar men termınaldardy ornatý boıynsha ShOB-pen jumys júrgizý tapsyryldy. Sonymen qatar, ákimniń orynbasary M.Bekturovaǵa Memlekettik kiris departamentimen, aýdan ákimderimen birlese otyryp, ShOB-tiń zańsyz nysandary boıynsha jumystar júrgizý júkteldi.
Qorshaǵan ortany qorǵaý jáne tabıǵatty paıdalaný basqarmasynyń basshysy Musa Tanabaev qalanyń 2018-2020 jyldarǵa arnalǵan qorshaǵan ortany saýyqtyrý jónindegi keshendi is-sharalar josparynyń oryndalýy týraly baıandady.
Ákim qalanyń sanıtarlyq jaǵdaıy syn kótermeıtinin tilge tıek etti.
«Mobıldi top aınala júrip, zańsyz kásipkerlik qyzmetti anyqtady. ShOB nysandarynyń sáýlettik kelbeti, tamaqtaný nysandarynyń sanıtarlyq jaǵdaıy normalarǵa sáıkes kelmeıdi. Aýdan ákimderi ár nysanǵa óz aıaǵymen baryp, jaǵdaıdyń mán-jaıyn tekserip, nátıje shyǵarýy kerek», – dep atap ótti ol.
Sonymen qatar, Baqyt Sultanov saýda nysandary arasynda aldyn alý sharalaryn ótkizýdi, buzýshylyqtardy anyqtaýdy jáne olardy joıý boıynsha shuǵyl sharalar qabyldaýdy tapsyrdy.
Keńeste syrtqy jarnama mátinderin ornalastyrý jáne olardy tıimdi paıdalaný máseleleri de talqylandy.
