Jıyndy ashqan basqarma tóraǵasy Abylaı Myrzahmetov Prezıdent óz Úndeýinde eń aldymen aıqyndyq pen turaqtylyqtyń mańyzdy ekenin aıtqanyna toqtaldy. «Qoǵamǵa da, bızneske de aıqyndyq kerek. Joǵarǵy bılik Konstıtýsııaǵa súıenip, zań negizinde qadam jasady. Prezıdentimiz Elbasymen de, elimizdegi basqa da saıası kúshtermen, Parlament, Úkimet basshylarymen aqyldasqanyn aıtyp ótti. «Atameken» kásipkerlerdi biriktirip otyrǵan uıym bolǵandyqtan, bızneske eń birinshi turaqtylyq kerek ekenin aıtqym keledi. Kásipker úshin óz bıznesin damytý, eldegi ınvestısııalyq ahýaldardyń oń bolýy, ishki bızneske de, syrttan keletin bızneske de eldiń turaqtylyǵy, qoǵamnyń turaqtylyǵy, aýyzbirshiligi kerek», dedi basqarma tóraǵasy.
Prezıdent sheshimine baılanysty óńirlerdegi kásipkerler de qoldaý bildirip, óz pikirlerimen bólisti. Mysaly, «Almaty aýyr mashına jasaý zaýyty» AQ bas dırektory Jetpisbaı Edigenov bul sheshim ýaqtyly qabyldanǵanyn aıtty.
«Men óz basym jyldam sheshim qabyldaǵandy jaqsy kóremin. Nege deseńiz, zaýyttyń basshysy bolǵan soń, kez kelgen sharýada naqtylyq qajet. Bıznesti qoldaýǵa baǵyttalǵan sheshimder jalǵasyn taýyp, elimizde, tipti otbasynda turaqtylyqqa demeý bolatynyna senimdimin. Bıznes óz kezeginde saılaýǵa belsendi atsalysýy kerek», dep oıyn bildirdi Jetpisbaı Edigenov.
Shymkent qalasy Kásipkerler palatasy О́ńirlik keńesiniń tóraǵasy, «Otaý Qurylys» holdınginiń basshysy Qaırat Moldaseıitov Shym qalanyń kásipkerleri bul sheshimdi biraýyzdan qoldaıtynyn, bul tek bıznes emes, búkil halyq kútip otyrǵan sheshim ekendigin jetkizdi.
Kezekten tys Prezıdent saılaýyn ótkizý ınvestısııalyq klımattyń turaqtylyǵyn qamtamasyz etetinin aıtqan aqtóbelik «Kókjar» agroónerkásiptik taýar-shıkizat bırjasynyń basshysy Esimhan Qurmanǵazın sheteldik ınvestorlar osy tóńireginde oı qozǵaǵanyn da atady.
«Bizdiń óńirdegi sheteldik kompanııanyń dırektorymen birer kúnde bolǵan kezdesýde olardyń tarapynan alańdaýshylyq baryn baıqadyq. Árıne biz bıznes-áriptesterimizge bastalǵan árbir is jalǵasyn tabatynyn aıttyq. Elde turaqtylyq bolsa, ınvestısııalyq klımat ta turaqty bolady. Sony bárimiz qalaımyz, qoldaımyz», dedi Esimhan Qurmanǵazın.
Shyǵys Qazaqstan oblysyndaǵy iri bıznes ókili – «SemAz» JSSh bas dırektory Ásemqan Dosqojanov aqtóbelik áriptesiniń sózin qoldap, kezekten tys Prezıdent saılaýy ınvestısııalyq klımattyń durys qalyptasyp, jalpy eldiń ekonomıkalyq damýyna úlken yqpalyn tıgizetinin aıtty. Al «Atameken» UKP óńirlik palata dıreksııalary atynan sóz sóılegen Narıman Ábilshaıyqov bul sheshim eldegi áleýmettik-ekonomıkalyq turaqtylyq úshin asa qajet ekenin, halyq bolyp saılaýǵa belsendi túrde qatysýǵa daıyn ekenderin jetkizdi.
Basqarmanyń keńeıtilgen otyrysynda basqa óńirlerdegi kásipkerler de biraýyzdan bıznes qashanda naqty ári ashyq sheshimdi tańdaıtynyn, ár jasalǵan qadam bıznestiń damýyna tikeleı áser etetinin, bul rette kezekten tys Prezıdent saılaýy durys sheshim ekenin atap ótti.
