Kúndelikti ómirde biz jıi kórip júrsek te, syry men symbatyna zer salyp janymyzben úńile bermeıtin ár sáttiń ádemi kórinisi Aıanattyń bala qııalyna qanat bitirgendeı. Baıaban dalany myńboıaýǵa shomyldyrǵan ásem gúlder, jazǵy jazıra, dúnıege jan bitirgen shuǵylaly kóktem, syldyrap aqqan taý ózeni, býyrqanǵan asaý teńiz onyń kenebinde qaz-qalpynda kóz aldyńa keledi. Nebári 5-synypta oqıtyn Aıanat buǵan deıin birneshe respýblıkalyq baıqaýdyń jeńimpazy atandy. Byltyr IýNESKO sheńberinde uıymdastyrylǵan baldyrǵan sýretshiler festıvalinde de erekshe kózge túsipti. Almatyda onyń ártúrli janrda oryndalǵan qyryqtan astam shyǵarmasyn qamtyǵan jeke kórmesi ashyldy. Úlken armanǵa qol sozǵan kishkentaı sýretshiniń ıdeıasynyń keńdigi, taqyryptarynyń tereńdigi kóńil qýantady.
– Aıanattyń jumystaryna qarap óz qatarlastarynyń arasynda deńgeıi bar, bolashaǵynan mol úmit kútýge bolatyn sýretshi dep aıta alamyz. Kartınalarynan ómirge, qorshaǵan ortaǵa degen balaǵa tán kózqaras, qushtarlyq pen meıirim shýaǵy esedi. Gúlder, tabıǵat, teńiz, qustar, qala tynysy oǵan erekshe áser etken. Tús tańdaýy, kompozısııalyq sheshimderi bala júrekten órilgen. Keıde belgili zańdylyqtarǵa baǵynyp nemese oılardyń qursaýynda qalǵanyna baılanysty balalardyń oıyn, alǵan tústerin kásibı sýretshiler ala almaı jatatyn jaǵdaılar da bolady. Balanyń qasıeti – erkin, búkpesiz, taza kúıde beıneleı alýynda, – deıdi Qazaqstan Sýretshiler odaǵynyń múshesi Shattyq Batan.
Balǵyn sýretshini mektep tabaldyryǵyn attaǵan sátten sıqyrly ónerdiń syryna baýlyp júrgen ustazy Raýshan Nábıqyzy órimdeı qyzdyń degdar salaǵa degen ińkárligi týraly oıyn bylaısha jetkizdi: «Aıanattyń kózinde ot bar. Ol ómirge erekshe qushtarlyqpen, mahabbatpen qaraıdy. Sezimtal. Salǵan kartınalarynda teńiz ben aspandy, taý men dalany tutas qushaǵyna syıdyrǵysy keledi. О́ziniń «Kún men tún» dep atalǵan shyǵarmasynda aq pen qarany, ómirdiń kóleńkesi men shýaǵyn qatar qoıyp salystyra beıneleıdi. Sýretshini shyńǵa shyǵaratyn eńbek pen izdenis. Bul qasıetter kishkentaı shákirtimdi qatarlastarynan daralap turady».
Aıanattyń «Myńboıaýly tirshilik» dep atalǵan jeke kórmesine baryp onymen áńgimelesýdiń sáti tústi. Tórt jasynan sýret sala bastaǵan ol óz kartınalarynda qońyr tústi kóbirek paıdalanatynyn, bolashaqta Aısha Ǵalymbaeva apasy sııaqty áıgili qylqalam sheberi bolýdy armandaıtynyn aıtady.
