«Bizdiń komandamyz Parıj mańyndaǵy olımpıadalyq bazada daıyndalý ústinde. Toǵyz kúndik jıynǵa Fransııa quramasynyń bas bapkeri Iаn Baılon jetekshilik etedi. Fransýzdar bul jıynǵa eń myqty sportshylaryn qosyp otyr. Álem chempıony Steven Da Kosta, Kendjı Grıllon, Aleksandra Rechııalar da osynda. Fransııa tarapy barlyq shyǵyndy kóterip, ushyp kelý men jatyn oryn, tamaq máselesin ózderi sheshýde. Bul biz úshin úlken mártebe», - deıdi bas bapker.
Karateden Fransııa quramasy Eýropadaǵy eń úlken komandalardyń biri sanalady. Munda 200 myńǵa jýyq adam sporttyń osy túrine den qoıǵan jáne fransýz sportshylary álemdik reıtıngte joǵary oryndarda tur.
«Bul jıynnyń Marokkodaǵy Premer-lıga týrnıri qarsańynda ótýi biz úshin mańyzdy. О́ıtkeni, Rabatta ótetin týrnırden bastap sportshylardyń jıǵan upaıy 100 paıyz olımpıadalyq reıtıngke enedi. Al osyndaı iri básekege álemniń myqty komandasymen birge jattyǵý sportshylardyń kúshine kúsh qosary sózsiz. Biz tatamıde jıi kezdesemiz. Birde fransýzdar jeńse, endi birde bizdiń sportshylar basymdyq tanytady. Olardyń sparrıngtik kezdesýge qazaqstandyq karateshilerdi tańdaýy tegin emes. Bizdiń sportshylardyń bolashaǵy alda ekenin baıqap otyr, bul qýantady», - deıdi Jastalap Sanaýov.
Fransııadaǵy jıynǵa Darhan Asadilov pen Gýzalııa Gafýrova bastaǵan sportshylar qatysýda.
