Nur-Sultan qalasynyń Bilim basqarmasy basshysynyń orynbasary elordada 1-4 synyp oqýshylary tegin ystyq tamaqpen tolyqtaı qamtamasyz etilgenin aıtty.
«Sonymen qatar, 5 – 11 synyp aralyǵyndaǵy jekelegen kategorııaǵa jatatyn balalar ystyq tamaqpen qamtamasyz etilgen. Budan ózge, barlyq mektepte ata-analar esebinen tamaqpen qamtý uıymdastyrylǵan. 2019 jylǵy qyrkúıekten bastap Nur-Sultan qalasynyń ákimi B. Sultanovtyń bastamasymen kóp balaly otbasylardan shyqqan balalardy da tegin ystyq tamaqpen qamtamasyz etýdi kózdep otyrmyz», — dedi D. Jekebaev.
Sondaı-aq, spıker oqýshylardyń ata-analary mektep tamaǵyn baqylaýǵa qatysa alatynyn jáne mekteptiń brakerajdyq komıssııasynyń múshesi bola alatynyn aıtty. Oǵan múshe bolý úshin mektep basshylyǵyna júginý kerek.
«Komıssııaǵa kem degende 10 ata-ana, áleýmettik pedagog jáne mekteptiń medısına qyzmetkeri kiredi. Olar ashanaǵa kirip, azyq-túlik sapasyn tekseredi, taǵam ázirleý sapasyn baqylaıdy, ólsheıdi jáne as mázirine sáıkes qansha bolýy kerek ekenin tekseredi. Komıssııa músheleri barlyq azyq-túlik ónimine tıisti qujatty talap ete alady. Tamaqtan ýlanýdyń aldyn alyp, sapasyn tekserý úshin árbir ónimniń sertıfıkaty bolýy tıis», — dedi D. Jekebaev.
Sonymen qatar, bıylǵy 1 qyrkúıekten bastap elordanyń barlyq mektebi beınebaqylaýmen qamtamasyz etiledi, olar tek ashanalarda ǵana emes, sondaı-aq tamaqtar tikeleı daıyndalyp jatqan ystyq sehta ta ornatylady.
«2019 jyldan bastap atalǵan jumysty jeńildetý maqsatynda biz 30 mektepte beınekameralardy ornattyq, 1 qyrkúıekke qaraı qalanyń barlyq mektepterin qamtý kózdelgen. Keıbir mektepterde mobıldi qosymshalar jumys isteıdi, ata-analar balany tańerteń mektepke ákelgen kezde tamaqtyń daıyndalý prosesin baqylaı alady. Brakerajdyq komıssııa endigi beınebaqylaý arqyly tekseris jasaı alady», — dedi elordanyń Bilim basqarmasy basshysynyń orynbasary.
Ol, sondaı-aq, mektepterde tamaqtaný sapasyn taǵy basqa komıssııa — Bilim basqarmasynyń buıryǵymen qurylǵan qalalyq Vedomstvoaralyq sarapshylar toby tekseretinin aıtty. Komıssııa quramyna túrli vedomstvolardyń ókilderi kiredi. Bul — depýtattar, úkimettik emes uıymdar, ata-analar jurtshylyǵy.
«Bul top tańdaýly túrde mektepterge baraly. Vedomstvoaralyq sarapshylar toby mektepterde alǵashqy kóńil bóletin jaǵdaı – brakerajdyq mektep komıssııasynyń jumysy, esep qujattamasyn júrgizý, oqýshylardyń tamaqtaný rejımi, ekologııalyq taza aýyz sýmen qamtylý, tamaqtaný rasıony biryńǵaı standarttar men sanıtarlyq talaptarǵa saı kelip-kelmeıtinin tekseredi. Aıta keterlik jaıt, tamaq daıyndalatyn bólmege tek sanıtarlyq kitapshasy bar adamdar ǵana kire alady», — dep túsindirdi D. Jekebaev.
Baqylaýdyń úshinshi organy — Qoǵamdyq densaýlyq saqtaý departamenti. Eger bastapqy eki organ negizinen baqylaý fýnksııalaryn oryndasa, Qoǵamdyq densaýlyq saqtaý departamenti tek sanıtarlyq erejelerdiń buzylǵany anyqtalǵan jaǵdaıda ǵana jumysqa kirisedi. Departament ókilderi tekserip, aıyppul sanksııasyn jazyp, ákimshilik jaýapkershilikke tarta alady.
