Jol-patrýldik polısııasy polkiniń plasynda polısııa aǵa leıtenanty Daýlet Abýov pen polısııa leıtenanty Rýslan Búrkitbaev saltanatty túrde marapattaldy.
Polısııa departamentiniń baspasóz qyzmetiniń habarlaýynsha oqıǵa 26 naýryzda oryn alǵan. Esil ózeninde sýǵa batyp bara jatqan er adam týraly aqparatty «Talas 201» patrýli qyzmetkerleri qabyldaǵan bolatyn. Birneshe mınýt ótkennen keıin oqıǵa ornyna kelgen tártip saqshylary TJK qyzmetkerlerimen birlesip qutqarý sharalaryn júrgizip, muzdaı sýdan er adamdy alyp shyǵady.
Ishki ister mınıstri Erlan Turǵymbaevtyń atyna aman qalǵan er adamnyń qyzynan polıseılerge alǵys aıtalǵan haty kelip tústi.
Aınur Imanalıeva IIM basshylyǵyna jazǵan hatynda týysqandary men jaqyndarynyń atynan onyń ákesin qutqarý kezinde batyldyq pen erlik tanytqan polıseılerdi marapattaýdy suraǵan. Marat Imanalıev pen onyń qyzy elordalyq Jol-patrýldik polısııasy polkine kelip, ómirin saqtap qalǵany úshin polıseılerge rızashylyǵyn bildirdi.
Er azamat polıseılerdiń batyl jáne kásibı áreketteriniń arqasynda óziniń aman qalǵanyn aıtty.
Polısııa departamenti bastyǵynyń orynbasary polısııa polkovnıgi Bahytjan Malybaev polıseılerge medaldy tabystaı otyryp, adam ómirin qutqaryp qalý kezinde batyldyq tanytqany úshin olarǵa alǵys bildirip, aldaǵy ýaqytta óz qyzmettik boryshyn adal oryndaýǵa shaqyrdy.
Is-shara sońynda Bahytjan Malybaev polısııa qyzmetkerleriniń atyna jyly lebizderin bildirgeni úshin Imanalıevtarǵa alǵys aıtyp, elorda turǵyndarynyń alǵysy tártip saqshylary úshin eń úzdik marapat ekendigin alǵa tartty.
