Búgin ákim Baqyt Sultanov jol-kólik apatynan zardap shekkenderge shuǵyl medısınalyq kómek kórsetýge qatysqan medısına qyzmetkerlerimen kezdesti.
Kezdesýdi ashqan qala ákimi jergilikti dárigerler apat, órt jáne basqa da jazataıym oqıǵalar kezinde myńdaǵan adam ómirin qutqarǵanyn eske aldy. Jyl basynan jedel járdem qyzmeti 155 myńnan astam qońyraýdy qabyldap, qyzmet kórsetken.
«Medısına qyzmetkerleri 26 naýryzda bolǵan apatta kásipqoılyq pen jedeldiktiń joǵary deńgeıin kórsetti. Qaıǵyly oqıǵa ornyna tórt mınýt ishinde jedel járdem brıgadasy kelip, zardap shekkenderge alǵashqy kómek kórsetip, aýrýhanalarǵa jetkizdi. Jedel járdem qyzmetkerleri men qalalyq aýrýhanalardyń sheber jáne kásibı áreketteriniń arqasynda biz kóptegen adamdardyń ómirin saqtap qaldyq», – dedi Baqyt Sultanov.
Oqıǵa ornynda barlyǵy 15 jedel járdem brıgadasy jumys istedi.
«Sol qaıǵyly kúni bizdiń elimizdiń árbir azamaty bireýdiń qaıǵysyna ortaqtasa alatynyn, oǵan beı-jaı qaramaıtynyn kórsetti. О́z ómirine qaýip tóngendigine qaramastan, olar adamdardy avtobýstardan alyp shyǵýǵa kómektesti. Olardyń biri – №303 baǵdardyń júrgizýshisi Baqdáýlet Álibek. Ol oqıǵa ornyna jaqyn jerde bolǵan», – dep atap ótti B. Sultanov.
Ákim dárigerlerge, medbıkelerge, barlyq azamattarǵa kez-kelgen ýaqytta kómek qolyn sozýǵa jáne emosıonaldy qoldaý kórsetýge daıyn ekendigine úlken rızashylyǵyn bildirdi.
Kezdesý sońynda Baqyt Sultanov 14 densaýlyq saqtaý qyzmetkerine, sondaı-aq, zardap shekkenderdi qutqarýǵa kómektesken júrgizýshige alǵys hattar tabys etti.
Eske sala keteıik, 26 naýryzda Uly-Dala kóshesi men Qabanbaı batyr dańǵylynyń qıylysynda úsh avtobýs pen birneshe jeńil avtokólikterdiń qatysýymen úlken jol kólik oqıǵasy oryn alǵan bolatyn. Apat saldarynan eki adam qaza bolyp, 29 adam jaraqat aldy.
