Jastardyń sanasyna jat aǵymdarǵa qarsy myqty ımmýnıtet qalyptastyrý mańyzdy. Bul týraly búgin elordada ótip jatqan «Rýhanı Jibek joly. Islam jáne jastar: qazirgi zamanǵy syn-qaterler» taqyrybyndaǵy IV halyqaralyq dinı-ǵylymı konferensııada QR Aqparat jáne qoǵamdyq damý mınıstri Dáýren Abaev aıtty, dep habarlaıdy ortcom.kz tilshisi QazAqparat saıtyna silteme jasap.
«Biz jas urpaqtyń dúnıetanymyn durys qalyptastyrýymyz kerek. Qazirgi jastar óz pikirlerin ashyq aıta alady. Olar básekege qabiletti, bilimge qushtar. Eń bastysy olardyń sanasyna jat aǵymdarǵa qarsy myqty ımmýnıtet qalyptastyrý mańyzdy. Biz baı mádenıetimiz, erekshe salttarymyz, aıryqsha tarıhymyz bar memlekettermiz. Sondyqtan fanatızmge, dinı konservatızmge, dálelsiz qaǵıdalarǵa berilip ketpeı, týra joldan taımaı, dindi durys qyrynan nasıhattaı bilýimiz kerek dep oılaımyn», - dedi mınıstr.
Onyń aıtýynsha, dinı damýdyń qazaqstandyq modeli meıirimdilik, adamgershilik, beıbitshilik sııaqty qundylyqtardan quralady.
«Elordamyzda Elbasynyń bastamasymen Álemdik jáne dástúrli dinder kóshbasshylary seziniń ótkizilip turýy da osynyń aıǵaǵy bolsa kerek. Qazaqstan Uly dalanyń rýhanı muralary dástúrimizben sabaqtasyp ketken Islam qaǵıdalaryn qurmetteıdi. Alaıda zaıyrly, kópultty memleketterge tán, ózge nanym-senim ókilderiniń de tańdaýyna shekteý qoımaıdy. Kópkonfessııaly ártúrli ult ókilderi tatý-tátti ǵumyr keship otyrǵan qoǵamda birlik pen beıbitshilikti saqtaý birinshi kezektegi másele. Sondyqtan da bul qaǵdıdadan taımaımyz», - dedi D. Abaev.
Aıta keteıik, konferensııa jumysyna Eýrazııa jáne Uly Jibek joly elderiniń Bas múftıleri, din qaıratkerleri, dinı saladaǵy memlekettik organdardyń basshylary, laýazymdy tulǵalar, zııaly qaýym ókilderi, jalpy 300-ge jýyq delegat qatysyp otyr.
Jastar jyly aıasynda ótip jatqan konferensııanyń maqsaty - óskeleń urpaqty destrýktıvti aǵymnyń yqpalynan saqtandyrý, olarǵa durys dinı aqparat jetkizý, ekstremızm men terrorızmniń aldyn alý úshin Eýrazııa men Ortalyq Azııa elderi din qaıratkerleriniń kúshin biriktirý, tájirıbe almasý, «Rýhanı jańǵyrý» ıdeıasyn nasıhattaý.
