2018 jyly Bishkekte uıymdastyrylǵan qurlyq dodasynda grek-rım kúresinen Qazaqstan quramasy 2 altyn, 1 kúmis jáne 4 qola medalmen jalpy esepte ekinshi orynǵa taban tiregen bolatyn.
Alaıda, UWW (Birikken kúres álemi) 97 kelide beldesip, chempıon atanǵan ırandyq Mustafa Salehızadeni dopıng qabyldaǵany úshin jarystan shettetip, altyn medaldy qaıtaryp aldy. Osylaısha, chempıonat altyny ózbekstandyq Rýstam Aqsaqalovqa berilip, qola júldeger atanǵan qazaqstandyq Erulan Ysqaqov ekinshi orynǵa kóterildi.
«Kúmis medal resmı túrde qolyma áli tıgen joq. Biraq federasııa arqyly UWW (Birikken kúres álemi) resmı hat jibergenin bildim. Bul meniń Azııa chempıonattarynda jeńip alǵan tórtinshi júldem. 2014 jyly chempıon atansam, qalǵan úsh jarysta kúmis pen qolany enshilegen edim. Shynymdy aıtsam, qolanyń kúmiske aınalǵanyna aıtarlyqtaı qýanǵan joqpyn. О́ıtkeni, 2017 jáne 2018 jylǵy Azııa chempıonattarynda tap osy ırandyq balýannan jeńilgen edim. Kúres kezinde onyń áste sharshamaıtynyn baıqadym. Keıin bir jyldaı ýaqyt ony resmı jarystardan kezdestirmedik. Mine, búginde onyń dopıng arqyly jeńiske jetkeninen habardar bolyp otyrmyz. Eger ol dopıng qabyldamaǵanda, meniń ony jeńip, fınalǵa shyǵatyn múmkindigim bar edi. Sportta tyıym salynǵan zattardy qoldaný kóptegen balýannyń jolyn kesedi», - deıdi Erulan Ysqaqov.
Osylaısha, Qazaqstan komandasy 2018 jylǵy Azııa chempıonatynda jalpy esepte birinshi oryn ıelenip otyr. Ekinshi orynda Qyrǵyzstan, úshinshi orynda О́zbeksan komandalary ornalasqan.
