Komıtet basshysy Vladımır Bekkerdiń aıtýynsha, búginde Shúlbi sý qoımasy 100 prosentke tolyp tur. Osyǵan baılanysty QR Aýyl sharýashylyǵy mınıstrligi qoımadaǵy sýdy kóptep jiberýge sheshim qabyldady. Qazirgi kezde Ertis ózeninde muz keptelisi joq. Sondyqtan 15 sáýir men 2 mamyr aralyǵynda Shúlbi qoımasynan sý kóptep jiberiledi. Qazirdiń ózinde ol sýdyń kólemi sekýndyna 2 400 tekshe metrge deıin artty. Al 17-23 sáýir kúnderi sekýndyna 3 500 tekshe metr jiberiletin bolady. Osynyń aldynda aıtqanmyn, Pavlodar oblysynda 11 eldi mekenniń shetki úılerine sý jaqyndaýy múmkin. Barlyǵy ózenge jaqyn tómengi jaqta ornalasqan. Negizi, bárin baqylaýda ustap otyrmyz. Degenmen, bir máseleni eskerý kerek, sý kóptep jiberilgende ózenniń deńgeıi kúrt kóterilip ketedi, dedi V.Bekker elordadaǵy baspasóz máslıxatynda.
Aıta keteıik, ótken aptadaǵy brıfıngte komıtet basshysy Pavlodar oblysynda Ertis ózeniniń tasýynan qaı aýyldarǵa qaýip tónip turǵanyn aıtty. Biraq atalǵan eldi mekenderde tek shetki birneshe úıdi ǵana sý alyp ketýi múmkin. Pavlodar oblysy boıynsha sý tasqyny qateri 11 eldi mekenge tónip tur. Olardyń ishinde Kenjekól, Lenınskıı, Aqsý qalasy, Peschanoe, Aqsý kenti, Qarasuq, Tereńkól, Aqquly, Aqsaraı, Jańasaraı, Gosplemenstansııa sııaqty eldi mekender bar. Barlyǵy Ertistiń boıyn jaǵalaı ornalasqan. Biraq bul jerde mańyzdy bir máseleni eskerý kerek, sý atalǵan eldi mekenderdiń bárin alyp ketedi degen sóz emes. Árbir aýylda sý birneshe úıge ǵana kirýi múmkin. Máselen, Peschanoe aýylynda úsh úıge qaýip tónip tursa, Qarasýda eki-aq úı sýǵa jaqyn tur. Sol sııaqty Aqsý qalasynda bes úıge ǵana sý kirýi múmkin, dep atap kórsetken edi V.Bekker.
