Parlament Senaty Áleýmettik-mádenı damý jáne ǵylym komıtetiniń tóraǵasy Birǵanym Áıtimova óziniń sózinde sharanyń maqsaty men mindetterine toqtaldy. Onyń aıtýynsha, Qazaqstanda jyl saıyn múmkindigi shekteýli balalardyń sany artyp keledi. Tek sońǵy bes jylda olardyń sany 7,5 paıyzǵa ósti. Elimizde barlyǵy 680 myń múmkindigi shekteýli azamat turady, onyń ishinde 87 myńy 16 jasqa deıingi kámeletke tolmaǵandar bolyp otyr. Senator atap ótkendeı, mundaı jaǵdaı bilim berý, densaýlyq saqtaý, áleýmettik qorǵaý organdary tarapynan jańa sıpattaǵy jumys ádisterin ázirleýdi talap etedi.
Senat komıtetiniń basshysy elimizde múmkindigi shekteýli balalardyń problemalaryn sheshý úshin qajetti zańnamalyq jáne normatıvtik-quqyqtyq baza qalyptasqanyn atap ótti. Qazaqstan BUU Bala quqyqtary týraly konvensııasyna jáne basqa da halyqaralyq aktilerge qosyldy. Sonymen qatar, osy qujattardy iske asyrýǵa qatysty birqatar máseleler de bar.
«Múmkindigi shekteýli balalar halyqtyń qorǵalmaǵan sanattarynyń biri retinde memlekettiń erekshe nazar aýdarýyn qajet etedi», - dep atap ótti B.Áıtimova. Ol Senat depýtattary elordada ornalasqan «Nurly júrek» áleýmettik qyzmet kórsetý ortalyǵy men № 1 arnaıy mektep-ınternatta bolyp, tárbıelenýshilerdiń bilim alý jáne ómir súrý jaǵdaıymen, osy nysandardyń materıaldyq-tehnıkalyq jabdyqtalýymen tanysqanyn eske saldy. Depýtat Narıman Tóreǵalıev osyndaı maqsatpen Atyraý qalasyndaǵy «№ 3 arnaýly áleýmettik qyzmet kórsetý ortalyǵynda» bolyp qaıtty. Depýtattar sapar qorytyndysy boıynsha birlesken kúsh-jigermen sheshilýi tıis birqatar ózekti máselelerdi atap ótti. Atap aıtqanda, B.Áıtimova múmkindigi shekteýli balalarǵa arnalǵan oqýlyqtar sanynyń azdyǵyna, tıflopedagog, sýrdopedagog, defektolog jáne basqa da mamandardyń tapshylyǵyna, erekshe nazar aýdarýdy qajet etetin balalarmen jumys isteıtin mamandar jalaqysy deńgeıiniń tómendigine, aýyr eńbek jaǵdaılary úshin ústeme aqynyń jetkiliksiz deńgeıi máselelerine tıisti memlekettik organdar ókilderiniń nazaryn aýdardy.
Eńbek jáne halyqty áleýmettik qorǵaý vıse-mınıstri Svetlana Jaqypova múmkindigi shekteýli balalardy áleýmettik qorǵaý jáne qoldaý salasyndaǵy memlekettik saıasat, sondaı-aq osy sala boıynsha Qazaqstan Respýblıkasynyń halyqaralyq mindettemeleriniń oryndalýy týraly negizgi baıandama jasady.
Dóńgelek ústeldegi máseleler boıynsha bilim jáne ǵylym mınıstriniń orynbasary Elmıra Sýhanberdıeva jáne densaýlyq saqtaý mınıstriniń orynbasary Lázzat Aqtaeva depýtattarǵa óz mekemeleriniń jumystary týraly baıandap berdi.
Shara barysynda Májilis depýtaty Zaǵıpa Balıeva, Atyraý oblysy ákiminiń birinshi orynbasary Serik Shapkenov, «Asyl Bala» qoǵamdyq qorynyń tóraǵasy Gúlnar О́tepova, «Arýana» kópsalaly medısınalyq ońaltý ortalyǵynyń dırektory Shynar Málik, «Rýh-Álemdi jaqsylyq arqyly ózgertemiz» qoǵamdyq birlestiginiń jetekshisi Alma Bekpan sóz sóıledi. Osy sala boıynsha jumys isteıtin úkimettik emes uıymdardyń ókilderi senatorlar men ortalyq atqarýshy organdardyń ókilderine suraqtar qoıdy.
Senat depýtaty Narıman Tóreǵalıev múgedekterdi, onyń ishinde kámeletke tolmaǵandardy áleýmettik qorǵaý jónindegi zańnamalyq jáne normatıvtik-quqyqtyq bazanyń oryndalý barysyna jan-jaqty taldaý jasady. Ol sondaı-aq múmkindigi shekteýli adamdardy medısınalyq jáne áleýmettik ońaltý, olarǵa jekeleı bilim berý máselelerine toqtaldy. Senator sonymen qatar osy sala jónindegi sapar barysynda Atyraý oblysynda kóz jetkizgen jaǵdaılar týraly aıtyp berdi.
Senatorlardyń jáne basqa da dóńgelek ústelge qatysýshylardyń usynystary negizinde qorytyndy usynystar daıyndaldy, olar Úkimetke, tıisti ortalyq jáne jergilikti memlekettik organdarǵa jiberiletin bolady.
