Qoǵamdyq birlestiktiń jetekshisi Dáýren Babamurat bul jolǵy saılaýdyń aldyńǵylarǵa uqsamaıtynyn, jańa jaǵdaı ekenin tilge tıek etti. «Qalyptasqan jaǵdaıda osy ýaqytqa deıin ekonomıka men halyqaralyq deńgeıdegi Elbasynyń jetistikterin saqtaı otyryp, jańa belesterge umtylý úshin halyqqa da saıası aıqyndyq qajet. Halyqtyń kókeıinde ne bar, qandaı máseleler mazalaıdy? Kópshilik saılaýǵa túsetin azamattardan osyny kútedi. «Ekonomıka elge jumys isteýi kerek. Shaǵyn jáne orta bızneske erkindik berý kerek. Jemqorlyqpen kúresti shynaıy túrde júrgizý qajet. Saıası reformalarǵa jol ashý kerek. Elge birlik, saılaýǵa ádildik, ekonomıkaǵa turaqtylyq qajet. Sol sebepti saılaý naýqanyna barynsha qatysý dál qazir árbirimizdiń mindetimiz», dedi D.Babamurat.
Spıker sondaı-aq shetelden kelgen ınvestorlardy erteń Qazaqstanda jaǵdaı qandaı bolady, halyqtyń jaǵdaıy qalaı qalyptasady, alǵa qoıǵan maqsattarymyz qaıtip sheshiledi degen máseleler alańdatyp otyrǵanyn jetkizdi. Sebebi «halyqaralyq zań Prezıdenttiń mindetin ýaqytsha atqarýshy» degendi qabyldamaıdy. Munyń sońy elden ınvestısııanyń jylystaýyna alyp kelýi de ábden múmkin.
«Qazaq eliniń birligine jáne birtutastyǵyna syna qaqqysy keletinder óz ishimizde de, syrt elderde de barshylyq. El basqarýǵa laıyqty tulǵany tanyp, oǵan senim bildirýdi keshiktirýge bolmaıdy», dep atap ótti D.Babamurat. Onyń aıtýynsha, Qazaqstannyń múddelerin álemde ilgeriletý jáne nátıjeli halyqaralyq baılanystardy saqtap qalý úshin memleket bıliginiń sabaqtastyǵy qajet.
Halqymyz sońynan jurtty erte alatyn, álemdik qoǵamdastyq aldynda Qazaqstandy laıyqty tanystyra alatyn tulǵany órkenıetti jolmen tańdaýy tıis. Zańdy saılaý – el bolashaǵynyń turaqtylyǵynyń kepili. Sondyqtan jastar ókilderi bul naýqandy zań aıasynda ótkizýge barynsha atsalysatyn bolady.
