Zárip kókemiz alǵashqyda aýla ishinen monsha salyp alypty. Oǵan jeti myńǵa tarta bótelke jumsalǵan. Soıy bólek monshaǵa túsýge nıet bildirgender kóbeıip, jaqsy jasalǵanyna, ishiniń minsiz, naǵyz babyna keltirilgenine maqtaý aıtyp, táýekeldiń ústinde júrgen azamattyń úı salsam degen sheshimin nyǵaıta túsedi.
О́nerli adam bir iske bekinse baǵytynan aınytý qıyn. Zárip Mysabekov úı salý úshin qyryq myńǵa jýyq bos bótelkeni jınaıdy. Oǵan aýyldastary da járdem bergen. Baıaǵydaı dúkender bos bótelkeni aqshaǵa qabyldaı bermeıdi. Toı-tomalaqtan soń bos qumyralar aýyldyń repetin alyp, ár jerde domalap jata beredi. Ony jınap alyp tutynýshysyna berseń, aýyl qoqsyqtan tazarady. Sonymen Zárip uzyndyǵy on eki, eni segiz metr bolatyn baspana turǵyzyp aldy. Munyń da óz ereksheligi bar eken. Qysta jyly, jazda salqyn bolatyn bul úıge aýyldastarynyń ishinen qyzyǵýshylyq tanytyp jatqandar az emes.
Zákeń úıdiń syrtqy qabatyn ashyq kúıde qaldyryp, ishin ǵana sylaǵan. Munyń taǵy bir jaqsylyǵy, syrtyn sýmen aınadaı etip jýyp alýǵa ábden bolady. Otaǵasynyń táýekeli jubaıy Sáýle Ybyraevany da qanattandyryp otyr.
«Rasymen jaqsy qurylys materıaly bolady eken, deıdi ol. Endi osy tásilmen jylyjaı jáne dúken turǵyzsaq degen nıetimiz bar». Nıetke jetken jaqsy. Qam kesek, qyzyl kirpishten úıdi árkim-aq turǵyzady. Sheteldiń biraz qalalaryna jolymyz tústi. Adam oıyna kelmeıtin materıaldardan túrli nysandar, oıyn-saýyq ortalyǵyn turǵyzǵandardy kórdik. Adamdar kóp keledi. Tutynýshysy kóp.
Myna Jambyl oblysy Moıynqum aýdanyndaǵy jol boıynda kemeden kafe ashyp qoıǵan azamat bar. Túnde shamdary jarqyrap qum ústinde júzip kele jatqandaı áser beredi. Sol sııaqty, Zárip sheberdiń bosaǵan bótelke qumyralarynan turǵyzylǵan úı-jaıy da ataqty shaıyr Turmaǵambet aýylynyń kórkine kórik qosyp tur.
Qyzylorda oblysy
