Atalǵan baıqaýdyń basty maqsaty – Shekara qyzmetiniń jaýyngerlik qyzmetin keńinen nasıhattaý, áskerı qyzmetshilerdiń otbasylaryna qoldaý kórsetý, shalǵaıdaǵy shekara bólimshelerindegi qyzmettiń bedelin arttyrý, sondaı-aq áskerı qyzmetshiler jubaılarynyń shyǵarmashylyq áleýetin nasıhattaý.
Baıqaýǵa Shekara qyzmetiniń aýmaqtyq bólimshelerinen 14 úmitker qatysty. Baıqaý shartyna sáıkes árbir qatysýshy shalǵaıdaǵy shekara bólimshesindegi otbasy turmysynyń erekshelikterin, qyzmet jaǵdaıyndaǵy otbasylyq ómirdiń mańyzyn beınerolık arqyly kórsetýi tıis boldy.
Usynylǵan beınerolıkter «shekaraknbkz» Instagram paraqshasynda jarııalanyp, onlaın daýys berý Telegram arnasynda ótkizildi.
Baıqaý UQK Shekara qyzmeti Áskerı-patrıottyq qyzmet basqarmasy uıymdastyrǵan jáne «Zastava Tarlandary» respýblıkalyq qoǵamdyq birlestiginiń qoldaýymen ótkizildi.
Marapattaý rásimi Shekara qyzmetiniń Ortalyq apparatynda saltanatty túrde ótkizildi.
«Baıqaý joǵary deńgeıde ótkizildi. Arnaıy shalǵaıdaǵy zastavalarda qyzmet atqaratyn áskerı qyzmetshilerdiń otbasylaryn qoldaý óte mańyzdy. Qatysýshylardyń shyǵarmashylyq áleýetin, patrıottyq rýhyn jáne otbasylyq qundylyqtardy dáripteýin kórgenimizge qýanyshtymyz», dedi «Zastava Tarlandary» RQB tóraǵasynyń orynbasary, polkovnık J. Madedınov.
Qorytyndy nátıjege sáıkes Shekara qyzmeti Mańǵystaý oblysy boıynsha departamentiniń atynan qatysqan Arýjan Kýlmanbetova bas júldeni ıelendi. Shekara qyzmeti Batys Qazaqstan oblysy boıynsha departamenti atynan qatysqan Aınazym Qabyltaı ekinshi oryndy jeńip aldy.
Al Shekara qyzmeti Pavlodar oblysy boıynsha departamenttiń ókili Marjan Chýjaeva qurmetti úshinshi orynǵa ıe boldy.
«Shekara arýy – 2025» fotobaıqaýynyń jeńimpazy anyqtaldy
«Barlyq qatysýshylar shyǵarmashylyq sheberligimen, shynaıy patrıottyq rýhymen jáne otbasy qundylyǵyn dáripteı bilýimen erekshelendi. Mereke qarsańynda barsha áıelderdi Halyqaralyq áıelder kúnimen quttyqtaı otyryp, memlekettik shekarany kúzetip júrgen jaýyngerlerge senimdi tirek bolǵan aıaýly jandarǵa aıryqsha rızashylyǵymyzdy bildiremiz», delingen UQK Shekara qyzmetiniń habarlamasynda.
