Adal joldyń azaby

Seısenbi, 24 shilde 2012 7:40

Materıaldarmen tanysyp, mán-jaıǵa qanyqqannan keıin hat ıesine: «Bolar is bolyp, boıaýy sińgen eken. Keıin bári ornyna kelipti ǵoı, óshe bastaǵan qolamtany endi kósep qaıtesiz», dedim. Ol oılanyp qaldy. Sálden soń ǵana: «Men bireýde kegim ketti dep óshigip júrgen adam emespin. Aqqa Qudaı jaq, bári ornyna kelgeni ras. Maǵan qara kúıe jaqpaq bolǵandardyń áreketterinen eshteńe shyqqan joq. Biraq, adal atym qymbat. Mundaı qııanat qaıtalanbaýy úshin, basqalar sabaq alsyn degen nıetpen qozǵap otyrmyn. Bul meniń jeke basyma ǵana qatysty másele emes, kerek deseńiz, eldiń qaýipsizdigimen astasyp jatqan jaı», dedi.
Nesi bar. Oryndy sóz. Men onymen kelistim.

Seısenbi, 24 shilde 2012 7:40

Materıaldarmen tanysyp, mán-jaıǵa qanyqqannan keıin hat ıesine: «Bolar is bolyp, boıaýy sińgen eken. Keıin bári ornyna kelipti ǵoı, óshe bastaǵan qolamtany endi kósep qaıtesiz», dedim. Ol oılanyp qaldy. Sálden soń ǵana: «Men bireýde kegim ketti dep óshigip júrgen adam emespin. Aqqa Qudaı jaq, bári ornyna kelgeni ras. Maǵan qara kúıe jaqpaq bolǵandardyń áreketterinen eshteńe shyqqan joq. Biraq, adal atym qymbat. Mundaı qııanat qaıtalanbaýy úshin, basqalar sabaq alsyn degen nıetpen qozǵap otyrmyn. Bul meniń jeke basyma ǵana qatysty másele emes, kerek deseńiz, eldiń qaýipsizdigimen astasyp jatqan jaı», dedi.
Nesi bar. Oryndy sóz. Men onymen kelistim.

Endi negizgi áńgimege kósheıin. Hat ıesi dep otyrǵanym – Eleýsiz Shaǵyr­baı­uly Aıtbaev. Jasy alpysty alqymdap qalǵan azamat. Eki birdeı joǵary bilimi bar. 1976 jyly Qazaq polıtehnıkalyq ınstıtýtynan ınjener-qurylysshy ma­­mandyǵyn alyp shyqsa, 2002 jyly Turar Rysqulov atyndaǵy Qazaq ekonomıkalyq ýnıversı­tetin «Memlekettik jáne mýnısıpaldyq basqarý» mamandyǵy boıynsha támamda­ǵan. Biraz istiń tizginin ustaǵan, qyzmet baspaldaqtarymen ósip otyrǵan. Sonyń bárin tizbeı-aq, Eleýsiz Aıtbaevtyń 1979-2008 jyldar araly­ǵynda Shymkent oblysy Jetisaı aýdan­dyq komsomol komıte­ti­niń birinshi hatshysy, respýblıka Aýyl sharýashylyǵy mınıstrliginiń №3 «Jeti­saıaýylqu­ry­lys» tresi birikken kásipodaq komıtetiniń tóraǵasy, Jetisaı qalalyq atqarý komı­te­tiniń tóraǵasy, Maqtaaral aýdany áki­mi­niń orynbasary, Qazaqstan Res­pýblı­kasy Tabıǵı monopolııalardy ret­teý jáne kásipkerlikti qorǵaý, shaǵyn bıznesti qoldaý jónindegi agenttiginiń bólim bas­tyǵy, Soltústik Qazaqstan oblysy boıynsha eńbekpen qamtý jáne áleý­met­tik baǵdarlamalardy úılestirý departa­men­ti bastyǵynyń birinshi orynbasary qyz­metterin atqarǵanyn aıtsaq ta, onyń bılik tarmaqtarynda eńbek ete júrip edáýir tájirıbe jınaqtaǵan maman eke­nine kóz jetkizemiz. 2008 jyldyń 28 shil­de­sinde Qazaqstan Respýblıkasy Eńbek jáne halyqty áleýmettik qorǵaý mınıs­tr­liginiń Kósh-qon komıteti tóraǵasynyń buıryǵy boıynsha aýysý tártibimen Aqmola oblys­tyq kóshi-qon departamen­tiniń dırektory bolyp taǵaıyndalǵanda da onyń osy qasıetteri eskerilgen shy­ǵar-aý. Alaıda ol bul orynda kóp otyra alǵan joq. Arada tórt aı ótpeı jatyp qyzmetinen bosatyldy. Osy arada E.Aıtbaev aınalasy úsh-tórt aıdyń ishinde ne búldirip tastady eken degen saýaldyń oıqastap shyǵa kelýi zańdy. Bul jóninde komıtet tóraǵasy qol qoıǵan buıryqta «memlekettik qyzmet­shiniń ózine júktel­gen mindetterdi oryn­damaǵany jáne tıi­sinshe oryndamaǵany úshin» delingen. Bi­raq E.Aıtbaev bul tujy­rymmen kelis­peı­­di, bári oıdan shyǵaryl­ǵan, jala deıdi.

Qalaı desek te, E.Aıtbaev pen Eńbek jáne halyqty áleýmettik qorǵaý mınıs­tr­ligi Kósh-qon komıteti basshylarynyń arasynda bir kelispeýshiliktiń bolǵany anyq. Bul neden bastaldy? Hat ıesiniń aıtýynsha, ol jańa qyzmetin aınalym­daǵy qujat­tarmen tanysýdan bastaıdy. Osylaı ju­mystyń atqarylý sapasynyń tómen eke­nine, berilgen tapsyrmalardyń ýaqytyly oryndalmaıtynyna kóz jet­kizedi. Depar­tamenttiń keıbir qyzmetker­lerine jiber­gen kemshilikteri úshin alǵa­shynda aýyzsha eskertýler jasaıdy. Kóshi-qon komıteti tóraǵasynyń 09.06.08 j. №26-ó buıry­ǵyna sáıkes osyǵan deıin «Aqmola oblysy boıynsha kóshi-qon bas­qarmasy» atalyp kelgen memlekettik meke­meni «Aqmola oblysy boıynsha kóshi-qon departamenti» dep ózgertedi, jańa mór, mórtaban jasatady, basqa da uıymdastyrý sharalaryn qolǵa alady.
Soǵan qaramastan, keıbir qyzmet­ker­ler burynǵy ádetterine basyp basshynyń syn-eskertpelerine qulaq aspaıdy, eski qujat­tardy paıdalanýlaryn jalǵastyra beredi. Ol ol ma, keıbireýi mekeme móri­niń zańsyz qujattarǵa qoıylýyna jol beredi. Osyǵan baılanysty departament basshysy túrli máselelermen kelgen oral­mandardy kún saıyn ózi qabyldap, mamandarǵa naqty tapsyrmalar berip otyrady. Mundaı tár­tipke daǵdylanbaǵan departament qyzmet­kerleri jaýapker­shi­lik, ıkemdilik tanyta qoımaıdy. Onyń arty belgili ǵoı, jumys­ta jibergen kemshilikteri úshin birneshe mamannan túsiniktemeler alynyp, eskertýler jasalady. Jańa basshynyń osyndaı oryndy talaby, qoldanǵan sharalary eń aldymen burynǵy bastyǵynyń tusynda oıyna ne kelse sony istep, erkin júrýge úırenip qalǵan departament bastyǵynyń orynbasary E.Isenovke unamaıdy. Endi E.Aıt­baev mamandarǵa jáne óziniń orynbasary E.Isenovke tapsyrmany jazbasha berip, olardyń oryndalýyn qatań qadaǵalaıdy, kemshilikterin kózge shuqyp kórsetip, alda­ǵy ýaqytta olardy boldyrmaýdy talap etedi. Qandaı kemshilik deseńiz, olardan aıaq alyp júre almaısyz. Mysaly, О́zbek­stannan keldi degen «oralman» Nasıba Myltyqbaevanyń týý týraly kýáligi jal­ǵan bolyp shyǵady. Mundaǵylar buryn О́zbekstanmen shekaralas aýdandarda basshy qyzmetter atqarǵan E.Aıt­baevtyń ózbek tiline jetik ekenin qaıdan bilsin, burynǵy ádetterimen bireý­lerdiń syrtynan shala-sharpy toltyryl­ǵan qu­jat­tardy tyqpalaı beredi. N.Myl­tyqbaeva tólquja­ty boıynsha О́zbekstan Respýblıkasynan tirkeýden shyqpaǵan. Soǵan qaramastan, kóshi-qon polısııasy onyń turaqty mekeni Shýchınsk qalasy, Tolkýnov kóshesindegi 20-úı dep kór­set­ken. Bul da túk emes, eń bastysy – kvo­ta­ǵa qosý týraly ótinishke N.Myltyqbae­vanyń ózi qol qoımaǵan. Sol sııaqty, Aıgúl Meıir­hanova degen azamat­sha­nyń týýy týraly kýáliginiń blankisi Tashkent oblysy ádilet basqarmasynyki de, Buhara oblysynyń Romıtan aýdany aý­ma­ǵyndaǵy Gazlı qala­sy­nyń mórimen ras­talǵan. Al shyn máninde Gazlı shahary ákim­shilik bólinisi boıynsha Romıtan aýdanyna qa­ra­maıdy. Demek, usynylyp oty­ryl­ǵan qu­jat jalǵan. Má­rııam Asanova­nyń, Ul­bol­syn Sádenovanyń týý týraly kýálik­terinde de osyndaı óreskel qatelik­ter kózge uryp tur.
E.Aıtbaev qaramaǵyndaǵylardan ji­be­rilip jatqan kemshilikterdiń sebepterin suramaı ma. Biraq mardymdy jaýap ala almaıdy. Osyndaı biren-saran ǵana kem­shilik bolsa bir sári ǵoı, jańa basshy máselege tereń boılaǵan saıyn neshe túrli bylyq-shylyqqa tap bolady. Keı­bir azamattardyń týý týraly kýálik­te­riniń kóshirmesinde móri joq, ásheıin qaǵaz, qujattardyń toltyrylýynda kóp­te­gen sáıkessizdikter kez­desedi. Al ma­man­dardyń bergen jaýaptarynda eshqan­daı qısyn joq. О́zbekstannan keldi degen Sh.Hýdjonazarov, O.Sahatov sııaqty «oral­mandardyń» qujattarynyń bar­lyǵy jalǵan jáne ózderiniń nemese otbasy músheleriniń Qazaqstanǵa eshqashan kelmegeni anyqtaldy.
«Osy kezde men keıbir qyzmetker­le­r­diń óz jumystaryn adal atqarmaıtyn­daryna, jumystaǵy mindetterin asyra paıdalanatyndaryna kóz jetkizdim. Mysalǵa qujat­tardy qarap otyryp departament bastyǵ­y­nyń orynbasary men bas býhgalter ózim osy jumysqa aýysyp kelgennen keıin, 2008 jyldyń tamyz aıynyń basynda oralmandardyń tıisti aqshalaryn maǵan eskertpesten qazyna­lyq bank arqyly aýdarǵanyn bildim. Olardan sol úshin túsiniktemeler aldym. Mońǵolııadan kóship kelgen Moshke Tolqynnyń otbasynyń qu­jattary durys toltyrylmaǵan. Alǵashqy sheshimde otbasy músheleri 8 adam dep kórsetilse, men eskertý jasaǵannan keıin olardyń sany 5 adam bolyp shyǵa keldi. Olardyń oıla­ǵandary iske asqanda, memle­kettiń shamamen 430 myń teńge qarjysy ustaǵannyń qolynda, tistegenniń aýzynda ketetin edi. Osy kezde Aqmola oblysy boıynsha ishki ister departamentinen atalmysh óńirden oralmandar retinde qarjylaı járdemaqy alǵandyǵyn rastaıtyn О́zbek­stan Res­pýb­lıkasynyń 34 azamatynyń attary kórsetilgen suraý-hat keldi №10/4-1163, 27.11.08 j. Hatta jalǵan «oralman­dardyń» ústerinen qylmystyq is qozǵal­ǵandyǵy aıtylǵan. Olardyń tizimin bazadan qarastyrǵanymyzda oblystyq kóshi-qon basqarmasynan 26 mıllıon teńgeden astam aqsha alǵandary anyqtaldy. Biraq ol aqsha oralmandardyń qolyna tıdi me bolmasa joldan bireýler qaǵyp ketti me, ishki ister departamentindegiler isti negizsiz jaýyp tastaǵandyqtan bul jaǵy anyqtalmaı qaldy. Keıin tekseris barysynda anyq kóz jetkizilgen jaı – olardyń eshqaısysy Aq­mo­la oblysyna shyn máninde kóship kelmegen jáne esepke turmaǵan», deıdi E.Aıtbaev.
Osy arada memleket qarjysyna qol suǵýshylyq faktilerine eń aldymen bul iske jol bergen jergilikti kóshi-qon qyz­metkerleri, solarmen jumysy baılanysty tıisti laýazym ıeleri jaýapty ekenin basyn asha aıtyp alý shart. Árıne, osyndaı keleńsizdikterge kóz jetkizgen Eleý­siz Sha­ǵyrbaıuly qarap otyrmaıdy, óz tarapynan tıisti sharalar qoldana bas­taıdy. Sapasyz jáne kúmándi qujat­tarǵa qol qoı­maı keri qaıtaryp otyrady, jumys tárti­biniń joǵary bolýyn talap etedi. Batyrǵa da jan kerek degen emes pe, oralmandarǵa bólingen bıýdjettiń qar­jysyn jalǵan qujattarmen qymqy­rýdyń qıyndap bara jatqanyn túsingen qarsy top jaýapker­shilik­ten qutylý, ózderiniń jumys barysynda jibergen zań buzýshylyq áreket­teriniń izin jasyrý úshin qorǵanystyń eń tıimdi tásili – shabýyl degendeı, neshe­túrli qıturqy qı­myl­darǵa kóshedi, jańa bastyqtan quty­lý­dyń joldaryn qaras­tyra bastaıdy, onyń ústinen Kóshi-qon komıteti tóraǵa­synyń atyna aryz túsiredi. Aqyry sol aryzdyń negizinde E.Aıtbaev qyzmetinen bosatylady.
Eleýsiz Shaǵyrbaıuly istiń osylaı nasyrǵa shabatynyn bilmedi emes, bildi. Onyń aldyn alýǵa, jaǵdaıdy ýshyqtyr­maýǵa tyrysty. Sóıtip, osy saladaǵy sybaılas jemqorlyqqa qarsy shyǵý, QR «Ha­­lyqtyń kóshi-qony týraly» (13.12. 1997 j. №204) Zańy men QR Úkimetiniń «Kvota boıynsha oralmandarǵa turǵy­lyq­ty je­rine kóship kelý shyǵyndary, úı múlkin kóshirý (onyń ishinde maldaryn), úı-jaı satyp alý úshin qarjylaryn bólý jáne bir rettik járdemaqy tóleý Erejesin bekitý týraly» (6.01.2006 j. №15) qaýlysynyń múltiksiz oryndalýyn qatań talap etý, «deldaldar» men aram pıǵyldy mamandar­dyń ótirik qujattar daıyndap, oralman­darǵa tıisti bıýdjet qarjysyn jymqyrý­laryna tosqaýyl qoıý paryzym dep sana­ǵan ol bar jaǵdaıdy óziniń tikeleı basty­ǵyna habarlamaq bolady.
Ol: «2008 jyldyń 1 jeltoqsany kúni Kóshi-qon komıteti tóraǵasynyń orynbasary Nurahmet Saqtaǵanovtyń qabyl­da­ýyna kelip (tóraǵa aýyryp, qyzmet ornynda bolmady), jumys jaǵdaıynda oryn alyp otyrǵan keleńsizdikter jaıly, keıbir ma­mandardyń komıssııanyń qa­raýyna kúmán týǵyzatyn qujattar usy­na­tyndyǵyn, onyń ishinde jalǵan qujat­tar­dyń kóptep kezdesetinin aıtyp, zańsyz áreketterdi toqtatýǵa járdem berýin su­radym, olardyń birsypyrasyn komıtet­tiń jaýapty qyz­met­kerlerine kórsettim, deıdi. Biraq olar: «Kórmes túıeni de kórmes», degendeı, eleń etken joq. Qaıta komıtet tóraǵasy men onyń orynbasary N.Saqtaǵanov departamentte isteıtin aryz jazýshylardy barynsha qorǵashtap, maǵan deıin osy qyzmetti atqarǵan dırektor sekildi qujattarǵa qo­lymdy qoıýym kerektigin (qujattar kú­mándi bola tura, qylmysqa ıtermeleıti­nine qaramastan) aıtyp, maǵan qyzmet babynda qysym kórsete bastady. Olardyń qysymyna qa­ramastan, elimizge, onyń ishinde Aqmola oblysyna kóship kelmegen «oralmandar­dyń» otbasylaryna tizim boıynsha bıýd­jettiń qarjysyn bólýden bas tarttym».
Ol arada úsh kún ótkennen keıin 2008 jyldyń 9 jeltoqsanynda N.Saqtaǵanov ar­qy­ly Kóshi-qon komıtetine Astanaǵa shaqy­rý alǵanyn, komıtet basshylarynyń oral­mandardyń qujattaryn tekserýmen kóp aınalyspaýdy, eskertýlerdi kóbeıt­peı departament mamandarynyń usynǵan qa­ǵaz­da­ryna qol qoıa berýdi suraǵanyn, ózine deıin bolǵan dırektor jumysyn solaı atqarǵa­nyn jáne onyń komıtet basshylary aldynda jaqsy esepte bolǵanyn jet­kizgenin, oǵan óziniń men zań buzý­shylyqqa bara almaımyn, qyzmetimdi zań aıasynda, el úkimetiniń bizdiń jumysqa qatysty qaýlylarynyń talaptaryna saı atqara­myn, jalǵan «oralmandar» arqyly bıýd­jettiń qarjysyn bólgizbeımin, bul sala­daǵy sybaılastyq qylmys jaıly Soltús­tik Qazaqstan oblysynda qyzmet atqarǵan­nan habardar eke­nin, onyń arty jaqsy­lyqqa alyp barmaıtynyn es­kertkenin, komıtet basshysy óz talaptaryn orynda­maǵan jaǵdaıda qyz­metten bosaısyń, tipti statıamen qýyla­syń dep qatýlanǵanyn aıtady.
E.Aıtbaevtyń Soltústik Qazaqstan oblysynda oryn alǵan keleńsizdikti alǵa tartyp, bezekteýiniń jany bar. Bul kezde osy oblysqa kelgen 700 oralman ot­ba­synyń járdemaqy alysymen izim-ǵaıym joǵalyp ketkenin búkil el biletin. Osyndaı qýlyq-sumdyqty komıtettegiler estimedi, bilmedi deı almaısyń. Bildi. Biraq joǵaryda kelti­rilgen mysaldarǵa qaraǵanda, olardyń qyl­mystyń aldyn alý, mıllıondaǵan teńge (mıllıardqa da shyǵyp ketýi múmkin) memleket qarjy­synyń óz maqsatyna jum­salýy úshin tıisti sharalar qoldanbaǵany aıdan anyq. Qalaı desek te, Eńbek jáne halyqty áleýmettik qorǵaý mınıstrligi Kósh-qon komıteti basshylarynyń oral­man­darǵa bólingen qarjynyń talan-tara­j­ǵa túsip jatqany jaıly áńgime órship tur­ǵan kezde, jergilikti jerden jáne belgisiz bireýden emes, osy ispen kópten aınalysyp kele jatqan jaýapty adamnan, departament basshysynan túsken habarǵa nazar aýdarmaýlary, jyly jaýyp qoıa salýlary túsiniksiz. Álde, olar jaý jaǵadan alǵanda, bóri etekten tartty dep namys­tandy ma eken? Áı, qaıdam? Men bul arada komıtet basshylary jemqorlarmen jeń ushynan jalǵasyp, qyrýar aqshany qaltalaryna bas­ty degendi aıtqaly otyrǵan joqpyn. Bul máselemen, qajet bolsa, quqyq qorǵaý organdary aınaly­sýǵa tıis. О́kinishke qaraı, E.Aıtbaevtyń aıtýyna qaraǵanda, olar buǵan baspaı otyr. Ony Aqmola oblystyq ishki ister basqarmasynyń taıǵa tańba basqandaı anyqtalǵan jaǵdaıdy jyly jaýyp qoıa salǵanynan da ańǵarýǵa bolady.
Joǵaryda keıipkerimizdiń iske kiris­peı jatyp qyzmetinen bosatylǵanyn aıt­tyq. Osydan keıin komıtet tóraǵasynyń buı­ry­ǵyn zańsyz dep sanaǵan E.Aıtbaev ózin negizsiz qýdalaýdan qorǵaýdy surap Astana qalasy Almaty aýdandyq sotyna shaǵym túsiredi. Sot bul talap aryzdy azamattyq is retinde qarap, 2009 jyldyń 23 qań­tarynda E.Aıtbaevty burynǵy at­qarǵan laýazymdy qyzmetine qaıta taǵaı­yndaý týraly sheshim shyǵarady jáne Kóshi-qon komıtetin E.Aıtbaevqa 2008 jyldyń 10 jeltoqsany 2009 jyldyń 23 qańtary aralyǵynda lajsyz bos júrgeni úshin 142 myń teńge tóleýge mindetteıdi. Sot sheshim qabyldaǵannan keıin ol tez arada oryn­dalýǵa tıis. Biraq basqa qyzmetke aýysyp ketken bastyǵynyń ornyn ýaqytsha basyp qalǵan N.Saqtaǵanov qalalyq sotqa, Joǵarǵy Sotqa shaǵym­danatynyn aıtyp, E.Aıtbaevty jumysqa qaıta qabyldaýdan úzildi-kesildi bas tartady. Osylaı áýre-sarsańmen biraz ýaqyt ótip, bul másele komıtet tóraǵasy bolyp Qabylsaıat Ábishev taǵaıyndalǵannan keıin ǵana sheshiledi. Q.Ábishev 2009 jy­l­dyń 11 naýryz kúni №13-j buıryq shy­ǵaryp, E.Aıtbaevty burynǵy qyzmetine taǵaıyndaıdy. E.Aıtbaev ádildik izdep sottyń tabaldyryǵyn tozdyryp júrgen­de komıtet E.Isenovti Aqmola obly­synyń kóshi-qon departamen­tiniń dırektory etip taǵaıyndap qoıǵan edi. Komıtet basshylary osy máseleni oń­taıly sheshýdiń ornyna E.Aıtbaev jumy­syna kiriser-kirispeste, 13 naýryz kúni komı­tet­tiń eki qyzmetkerin onyń ústinen 11 naýryz kúni túsken aryzdy tekserýge jiberedi. «Jumysqa kirispeı jatyp neni tekseretinderin túsinbeı ań-tań boldym. Keıin túsindim, bul maǵan jumys istetpeý maqsatynda uıymdastyrylyp otyrylǵan qýdalaýdyń basy eken. Bul tekserýdiń barlyǵy burynnan oılastyrylyp, komıtet basshylary tarapynan ssenarııi túzi­lip qoıylǵannan keıin, meniń shyndyqty dáleldep jatýymnyń eshqandaı qısyny kelmeıtini, ol dáleldeýdi tekserýshiler­diń qulaqqa da ilmeıtini belgili boldy. Sodan E.Isenov bastaǵan top aıqaılap-shýlap júrip tekserýshilerge hattama túzgizdi. Jınalysta oılaryna kelgen­derin aıtyp baq­ty» dep eske alady sol kúndi E.Aıtbaev.
Uzyn sózdiń qysqasy, osydan keıin E.Aıtbaev komıtet basshy­larynyń «kóme­gi­­­men» jumysynan taǵy da qol úzýge máj­búr boldy. Ol óziniń kinásiz ekenin myń márte dáleldese de qarsy­las­tarynyń toq­ta­maıtynyn sezdi. Oqıǵanyń odan ári ór­býi E.Aıtbaevtyń bul kúdigin de rasqa aınaldyrdy. Ádildik izdeımin, ózime júktel­gen mindetti adal atqaramyn, memleket qarjysynyń óz maqsatyna jumsa­lýyn qamtamasyz etemin dep saý basyna saqına tilep alǵan E.Aıtbaevty qaıt­kende de tize búktirýge, Aqmola oblystyq kóshi-qon departamentiniń esiginiń qaı jaqta ekenin umyttyrýǵa bel býǵan qarsy top endi onyń óziniń ústinen qylmystyq is qozǵatady. «Aqmola oblystyq qarjy polısııasy tergeý basqarmasynyń basty­ǵy Erik Esenov jáne Janat Aqmoldın qoqan-loqy, qorqy­tý-úrkitý arqyly meni QR Qylmystyq kodeksiniń 307-babynyń 2-tar­maǵy boıynsha jaýapqa tartpaqshy boldy. Zańsyz áreket­terge baryp meniń jeke basymdy kýálandyratyn qujatym­dy sebebin túsin­dir­mesten tartyp aldy. Osyndaı áreket­teri úsh jyl boıy jal­ǵasty. Is bolsa Aqmola oblystyq qarjy polısııasy, Aqmola oblystyq jáne Kókshetaý qalalyq prokýratýralary arasynda aınalyp, biri­nen birine aýysyp otyrdy. Maǵan ne úshin aıyp taǵatyn­daryn, qujattaryn kórsetý­lerin aýyzsha da, jazbasha da ótin­genime qaramastan, talap-tilegimdi udaıy aıaqsyz qaldyryp otyrdy Men isti sotqa ótki­zýlerin su­radym, oǵan da qulaq aspady. Sońynda ábden sharshaǵannan keıin men tergeýshige bulaı jalǵasa beretin bolsa departa­ment­ti sotqa beretinimdi aıttym. Me­niń isimmen tórt tergeýshi (J.Aqmol­­dın, E.Rahmatýllın, N.Shohanov, Q.Izbanov) birinen soń biri kezekpen aınalysty. Aqy­ry olar zańsyz áreketterinen eshteńe shyq­paǵan soń, qylmystyq isti toqtatýǵa máj­búr boldy», deıdi hat ıesi. Bul jóninde E.Aıtbaevtyń qolynda eki qujat bar. Birinshisine Kókshetaý qalasynyń prokýrory B.Bólegenov, ekinshisine Qa­zaqstan Respýblıkasy Bas prokýra­týrasynyń qu­qyq­­tyq statıstıka jáne arnaıy esepke alý jónindegi komıteti tór­aǵasynyń birin­shi orynbasary S.Nur­ly­baı qol qoıǵan. Eki qujatta da E.Aıt­baevtyń eshqandaı qyl­mys jasa­ma­ǵany aıtylady.
Áńgimeni soza bersek, osydan keıin de E.Aıtbaevty jazyqsyz qýdalaǵandarǵa, ja­la japqandarǵa qatysty saýaldar egiz qozydaı óre bereıin dep tur. Biraq olarǵa biz tóreshi bolmaıyq dep uıǵardyq. О́mir­diń shyndyǵy sol – bireýge jasalǵan qııa­nat qaıta aınalyp soǵady, soqqanda oń­dyr­maı soǵady, kim bolsań da sazaıyńdy beredi, táýbeńe keltiredi. Bir oıshyl: «Jaladan da qorqynyshty qarý bar, ol – aqıqat», degen eken. Iá, jalanyń joly ji­ńishke, aqıqat jeńedi. Bul joly da aqıqat jeńdi!

Jarasbaı SÚLEIMENOV,
«Egemen Qazaqstan».