Qala ákimi Baqyt Sultanov 20 sáýirge josparlanǵan jalpyqalalyq senbiliktiń keıinge shegerilgeni týraly Facebook paraqshasynda habarlady.
«Qurmetti astanalyqtar men qala qonaqtary! Bizdiń qaladaǵy aýa raıyn boljaý múmkin emestigin bilesizder. О́kinishke oraı, erteń de elordamyzda kún raıy sýyq bolyp, jańbyr jaýady dep kútilýde. Mundaı kún raıynda kóshege shyǵyp, tazalyq naýqanyn, aǵash otyrǵyzý sharalaryn júrgizý múlde yńǵaısyz. Aýa raıynyń qolaısyzdyǵyn eskere otyryp, men alǵashqy jalpyqalalyq senbilikti ótkizý kúnin aýystyrýdy usyndym», – dep jazdy Baqyt Sultanov.
«Qala turǵyndarynyń kóbisi erteńgi tazalyq aksııasyna belsene qatysýǵa nıet bildirgenin men jaqsy bilemin. Men Sizderdi osy raılaryńyzdan qaıtpaýǵa shaqyramyn. Nur-Sultan qalasyndaǵy jyly aýa raıy barshamyzdy jaqyn arada qaıta qýantyp, bizdiń jalpyqalalyq senbilikte birlesip, óz ýaqytymyzdy kóńildi ári paıdaly ótkizýimizge sep bolady dep úmittenemin!», – dep qosty qala ákimi.
Jalpyqalalyq senbilikti ótkizý ýaqyty týraly qosymsha habarlanatyn bolady.
