Kórme-jármeńke «Kórme» ortalyǵynda 24 jáne 27 sáýir aralyǵynda jumys isteıdi. Bıyl atalmysh shara tórtinshi ret ótpek.
Eurasian Book Fair 2019 kórme-jármeńkesine 13 eldiń 90 kompanııasy qatysady dep kútilýde. Olardyń arasynda Reseı, Ázirbaıjan, Armenııa, Tájikstan, Qyrǵyzstan, О́zbekstan, Túrkııa, Qytaı, Iran, Polsha, Belgııa, Latvııa, Ýkraına syndy elder bar.
«Folıant», «Almaty Kitap», «Atamura», «Mektep», «Qazaq ensıklopedııasy» sııaqty Qazaqstannyń jetekshi baspalary, «Mann, Ivanov ı Ferber», «Belyı gorod», «Rozovyı jıraf», «KompasGıd», «Samokat» sııaqty reseılik ataqty baspalar qatysýshylardyń qatarynda.
«Halyqaralyq kitap kórme-jármeńkesin ótkizýdiń basty maqsaty – kitapty nasıhattaý, qatysýshylardyń ádebı murasyn damytý, oqyrman mádenıetin qalyptastyrý», – dep málimdedi «Qazmedıa ortalyǵynda» ótken brıfıngte QR Mádenıet jáne sport mınıstrliginiń mádenıet jáne óner isteri departamentiniń dırektory Ábil Jolamanov.
Onyń aıtýyna qaraǵanda kórme baǵdarlamasynda 150-den astam is-shara, tusaýkeserler, ádebı ekskýrsııalar, poezııalyq baǵdarlar, avtorlarmen, baspagerlermen, sýretshilermen, polıgrafıstermen ótetin kezdesýler bar.
Kórme barysynda kitaptardy baspa baǵasy boıynsha satyp alý múmkindigi qarastyrylǵanyn aıta ketý kerek.
Balalar úshin sheberlik sabaqtary, konkýrstar, «Alısa Ǵajaıyptar elinde» ertegisiniń jelisi boıynsha uıymdastyrylatyn ınteraktıvti kvester, anımatorlardyń qatysýymen ótetin oıyn-saýyq baǵdarlamalar qarastyrylǵan.
