Erbol Shaımerdenuly ShAIMERDENOV
Juma, 14 jeltoqsan 2012 7:12
Qazaqstannyń mádenıeti aýyr qazaǵa dýshar boldy. 2012 jylǵy 13 jeltoqsanda 59 jasqa qaraǵan shaǵynda aqyn, jazýshy-pýblısıst, rámiztanýshy, Qazaqstannyń eńbek sińirgen qaıratkeri Erbol Shaımerdenuly Shaımerdenov qaıtys boldy.
Erbol Shaımerdenuly – sanaly ǵumyryn elimizdiń mádenıeti men baspasóziniń, til salasynyń órken jaıýyna arnaǵan qoǵam qaıratkeri. Ol memlekettik komıssııanyń múshesi retinde 1992 jyly qabyldanǵan memlekettik rámizderdi ázirleý, ulttyq geraldıkany qalyptastyrý isine aıtýly úles qosty, elimizdiń memlekettik rámizderi týraly birneshe eńbekter jazdy.
Juma, 14 jeltoqsan 2012 7:12
Qazaqstannyń mádenıeti aýyr qazaǵa dýshar boldy. 2012 jylǵy 13 jeltoqsanda 59 jasqa qaraǵan shaǵynda aqyn, jazýshy-pýblısıst, rámiztanýshy, Qazaqstannyń eńbek sińirgen qaıratkeri Erbol Shaımerdenuly Shaımerdenov qaıtys boldy.
Erbol Shaımerdenuly – sanaly ǵumyryn elimizdiń mádenıeti men baspasóziniń, til salasynyń órken jaıýyna arnaǵan qoǵam qaıratkeri. Ol memlekettik komıssııanyń múshesi retinde 1992 jyly qabyldanǵan memlekettik rámizderdi ázirleý, ulttyq geraldıkany qalyptastyrý isine aıtýly úles qosty, elimizdiń memlekettik rámizderi týraly birneshe eńbekter jazdy.
Qazaqstan Jazýshylar odaǵynyń múshesi, aqyn Erbol Shaımerdenuly ádebıet áleminde óz qoltańbasyn qaldyryp, birneshe óleń kitaptary jaryq kórdi. Birqatar ǵylymı-zertteý eńbekteri, pýblısıstıkalyq jınaqtary rýhanı muramyzdyń qoryn tolyqtyrdy. Jalpy alǵanda 20-ǵa jýyq kitaptyń avtory atandy.
Olardyń qatarynda «Kóńil sýreti» (1995 j.), «Júrektegi jazýlar» (2004 j.) atty jyr jınaqtary, «Tyńda toǵysqan taǵdyrlar» (1989 j.), «Qazaq eliniń rámizderi» (1993 j.), «Eltaný álippesi» (1998 j.), «Áz Astana» (1999 j.), «Qazaqstan Respýblıkasynyń rámizderi» (2001 j.), «Aqyl-oı antologııasy» (2004 j.), «Qazaq aforızmderi» (2008 j.), «Danalyq dıdary» (2002 j.), «Máńgilik murat» (2003 j.), «Aqıqat aınasy» (2004 j.), «Eltanym» (2005 j.) jáne basqa týyndylary bar. Eńbekteri birqatar shet tilderine tárjimalandy. Sonymen birge, «Arman qala – Astana», «Tógedi jańbyr», «Asyl jar», «Kólsaı», t.b. jazǵan birneshe án mátinderi tyńdarmanǵa jol tartty.
Bilikti aýdarmashy retinde álemdik fılosofııalyq oı-pikirlerdi qazaq tiline tárjimalady. Álemdik aforıstıka klassıkteriniń, A.Kamıý, F.Nısshe, H.Ortega-ı-Gasset, K.Iаspers, M.Haıdegger sııaqty fılosof qalamgerlerdiń birqatar shyǵarmalaryn aýdaryp, jarııalady. Qazaq avtorlarynyń týyndylaryn orys tiline aýdarýmen de shuǵyldandy.
Erbol Shaımerdenuly elimizdiń alǵashqy baspasóz qyzmetin qurýǵa eńbek sińirgen tanymal jýrnalıst. 1989 – 1991 jyldary Qazaqstan Kompartııasy Ortalyq komıtetiniń Baspasóz ortalyǵynyń jetekshisi qyzmetin, 1991 – 1996 jyldary Qazaq KSR Joǵarǵy Keńesiniń baspasóz hatshysy, Qazaqstan Respýblıkasy Parlamentiniń baspasóz hatshysy mindetterin zor jaýapkershilikpen atqardy. Elimizdiń bas gazeti «Egemen Qazaqstan» gazetinde uzaq jyldar qajyrly eńbek etti. Sońǵy ýaqytta ol Baılanys jáne aqparat mınıstrligi Aqparat jáne muraǵat komıteti tóraǵasynyń birinshi orynbasary, «Nur Otan» HDP Tóraǵasy birinshi orynbasarynyń keńesshisi bolyp qyzmet etti.
Erbol Shaımerdenulynyń sińirgen eńbekteri memleket tarapynan joǵary baǵaǵa ıe boldy. 2006 jyly ol «Qazaqstannyń eńbek sińirgen qaıratkeri» qurmetti ataǵyna ıe bolyp, 2011 jyly «Qurmet» ordenimen nagradtaldy. M.Dýlatov atyndaǵy syılyqtyń ıegeri atandy.
Erbol Shaımerdenulynyń esimi qazaqstandyqtardyń jadynda árdaıym saqtalady.
Qazaqstan Respýblıkasynyń Mádenıet jáne aqparat mınıstrligi
Qosh, aıaýly azamat!..
Asyl azamat, qımas dos Erbol Shaımerdenuly jaıyndaǵy júrek tebirenterlik sózdi kóńilsiz bastarmyz degen oı kimniń qaperinde boldy deısiz? Amal ne? Erekeńniń asyl armany, alǵa qoıǵan murat-maqsaty kóp edi-aý! «Myna bir bitpeıtin de qoımaıtyn memlekettik qyzmetten qutylsam, bar sharýany jıyp qoıyp, tek jazýǵa otyramyn. Ǵumyrym jetkenshe qalǵan ómirimdi basy bútin jazýǵa arnaımyn», deıtin. Oıǵa alǵan taqyryp-josparlary da ushan-teńiz-di.
Erekeń ózge tustastarymyzǵa qaraǵanda at jalyna erte jarmasty. Tuńǵysh Prezıdentimizdiń tuńǵysh baspasóz hatshysy boldy. Táýelsizdikke qolymyz jetken jyldary memlekettik máselelermen de etene aralasty. Memlekettik rámizder týraly jazylǵan alǵashqy eńbekterdiń avtory da Erekeń edi. Azattyq tańy atqanda shyn júregimen qýanyp, rámizderge qatysty óte dilgir sharýalardyń basy-qasynda júrdi. Jazǵan kitaptaryndaǵy derekter naq ómirdiń ózinen alynǵan shyndyq edi.
Birneshe óleńder jınaǵy jaryq kórdi. Kitap basý, kitap taratý isine de asqan jaýapkershilikpen kiristi. Týmysynan balajan, aqkóńil, adam jatyrqamaıtyn Erekeń jan-jaǵyna dos jınap júretin.
Táýelsizdiktiń alǵashqy jyldarynda boıyndaǵy bar jiger-qaıratyn memlekettik isterge arnaǵan Erbol Shaımerdenuly keshe táýelsizdigimizdiń 21 jyldyǵyn toılaýǵa eki kún qalǵanda, 60 jasyna eki jyl jetpeı baqıǵa attandy. Kóńilge medeý tutatynymyz – artynda balalary, nemereleri qaldy. Qudaı solarǵa ǵumyr bersin!
Topyraǵyń torqa, janyń jánnatta bolǵaı, Ereke!
QazGÝ-diń 1976 jyly bitirgen kýrstastary atynan Qýanysh JIENBAI, jazýshy, halyqaralyq «Alash» syılyǵynyń laýreaty.
