Jańa jobada jarysady
Beısenbi, 14 maýsym 2012 7:12
Jaqynda Londonda Halyqaralyq áýesqoı boks qaýymdastyǵy álemdegi áıgili úsh boksshymen AIBA-nyń ARV (AIBA Professional Boxing) jobasy boıynsha kelisim-shartqa qol qoıdy. Bul kelisim-shart Qazaqstannan eki dúrkin álem chempıony Serik Sápıevpen, Ázerbaıjannyń asa aýyr salmaqtaǵy boksshysy, álem chempıony Magomedrasýl Medjıdovpen jáne Koreıa ókili Djong-Hýn Shınmen jasaldy.
Beısenbi, 14 maýsym 2012 7:12
Jaqynda Londonda Halyqaralyq áýesqoı boks qaýymdastyǵy álemdegi áıgili úsh boksshymen AIBA-nyń ARV (AIBA Professional Boxing) jobasy boıynsha kelisim-shartqa qol qoıdy. Bul kelisim-shart Qazaqstannan eki dúrkin álem chempıony Serik Sápıevpen, Ázerbaıjannyń asa aýyr salmaqtaǵy boksshysy, álem chempıony Magomedrasýl Medjıdovpen jáne Koreıa ókili Djong-Hýn Shınmen jasaldy.
Bul qol qoıý rásimi bizdiń elden Londonǵa WSB (Búkilálemdik boks serııasy) jobasy aıasynda asa aýyr salmaqtaǵy horvatııalyq Fılıpp Hrgovıchpen qolǵap túıistirý úshin barǵan Rýslan Myrsataevtyń kezdesýiniń bastalýyna bir saǵat qalǵanda ótken. Al osy kezdesýde Myrsataevtyń qarsylasynan jeńilip qalǵany belgili.
Al aldaǵy kezde jańa joba aıasynda óner kórsetetin boksshylarǵa kelsek, ózimizdiń Serik Sápıev 28 jasynda tórt álem chempıonatyna qatysqan boksshy. Sonyń ekeýinde – 2005, 2007 jyldary chempıon bolsa, 2009 jyly qola medalǵa, al byltyr kúmis júldege ıe bolǵan. Qazir ol bas bapker Myrzaǵalı Aıtjanovtyń jetekshiligimen London Olımpıadasyna daıyndalýda.
Seriktiń ózi Halyqaralyq áýesqoı boks qaýymdastyǵynyń jańa jobasy boıynsha mynadaı pikir bildirgen eken.
– Búginde áýesqoı boksta bylǵary qolǵabyn shegege ilip, sharshy alańǵa múldem jaqyndamaı ketken talantty boksshylar kóp. Qazir bizdiń aramyzda da, sol boıyndaǵy kúsh-qýatyn der kezinde jumsaı almaı, jasy kelgende rıngten ketken boksshylar az emes. Men olardyń bárin aıtpaı-aq qoıaıyn. Sol boksshylarǵa AIBA-nyń kásipqoı boks jobasy der kezinde usynylǵanda olar, sóz joq, sharshy alańnyń shańyn áli biraz ýaqyt qaǵar edi. Al endi ózim osy jobaǵa kelgenime esh ókinbeımin. Bul joba maǵan óte unady. Bul – boksshynyń áýesqoı rıngten ketkennen keıingi áleýmettik-turmystyq jaǵdaıyn jaqsartýǵa, sporttaǵy jetistikterin jalǵastyrýǵa, bolashaǵyn qamtamasyz etýge, eń bastysy, ol AIBA men ulttyq boks federasııalarynyń birigip jumys isteýine jasalǵan joba.
Jalpy aıtqanda, AIBA-nyń kásipqoı boks jobasy – onyń Búkilálemdik boks serııasynan basqa jasaǵan úshinshi jobasy. Eger Búkilálemdik boks serııasynda (WSB) komandalar men reıtıng boıynsha úzdik shyqqan boksshylar arasynda jekelegen chempıonattar ótkizilse, ARV (AIBA-nyń kásipqoı boksy) jobasy boksshylardyń áýesqoı rıngten ketip, WSB serııasy sııaqty Olımpıada joldamasyna talasa alady.
Bul jobanyń jarystary 2013 jyldyń sáýir aıynan bastalady.
_________________________________________
Aqjoltaı!
«Samuryq-Qazyna» AQ-tyń basqarma tóraǵasy О́mirzaq Shókeev pen Sport jáne dene tárbıesi isteri agenttiginiń tóraǵasy Talǵat Ermegııaev Londonda ótetin HHH Jazǵy Olımpıada jáne HIV Parolımpııa oıyndaryna daıyndyq jáne qatysý sheńberinde yntymaqtastyq týraly memorandýmǵa qol qoıdy.
Kezdesýde «Samuryq-Qazyna» qorynyń tóraǵasy qordyń Olımpıadaǵa óz bıýdjetinen 900 mln. teńge bólgenin aıtty.
________________________________________
Toqsan altynshy joldama
Osy aptada London Olımpıadasyna taǵy bir joldama alǵan sportshynyń esimi belgili boldy. Ashyq sýda júzýden jalqy joldamany ıelengen sportshymyzdyń esimi – Iýrıı Kýdınov. Ol 1979 jyly Almaty qalasynda týǵan.
Kýdınov – sońǵy kezderi halyqaralyq jáne elishilik jarystarda top jaryp júrgen sportshy. Sondaı jarystardyń birinde – Portýgalııada ótken álemdik irikteý týrnırinde 10-oryn alyp, Olımpıada lısenzııasyn ıelendi.
Sóıtip, Qazaqstan sportshylary alǵan Olımpıada joldamasynyń sany 96-ǵa jetti. Sport jáne dene tárbıesi isteri agenttigi tórt jyldyqtyń basty básekesine 100-den astam lısenzııany jeńip alýdy maqsat etýde. Lısenzııalyq jarystar 9 shildege deıin jalǵassa, otandastarymyzdyń taǵy birneshe joldamany jeńip alýǵa shamasy jetedi dep oılaımyz.
Atletter reıtıngpen tańdaldy
Meńdihan TÁPSIR, Aýyr atletıka federasııasynyń bas hatshysy.
Jýyrda Taldyqorǵanda aýyr atletıkadan ótken Qazaqstan chempıonatynda 4 qyz ben 4 jigittiń London Olımpıadasyna joldama alǵany belgili. Solardyń ishinde joldama alǵan Farhad Harkı men Arlı Chonteı týraly kóp adamdar bile bermeıdi.
Negizi, bizdiń ziltemirshilerdiń 8 joldamany jeńip alǵanyn bilesizder. Olardyń esimderi osy kezge deıin belgili bolǵan joq. О́ıtkeni, biz úsh reıtıng boıynsha úzdik nátıje kórsetip júrgen ziltemirshilerdi el chempıonatynda tańdap alýdy jón kórgen edik. Sóıtip, birinshi reıtıng Halyqaralyq aýyr atletıka federasııasynyń tizimi, ekinshisi bapkerler keńesiniń reıtıngi jáne úshinshisi ulttyq qurama bas bapkeriniń keńesshisi Ánýar Túrkelerıdiń reıtıngisi boıynsha tańdap alynatyn bolyp sheshildi. Jasyratyn nesi bar, el chempıonatynda bári jaqsy óner kórsetti. Alaıda, Ilın men О́teshevtiń, Harkı men Chonteıdiń Halyqaralyq federasııadaǵy reıtıngisi, bapkerler keńesindegi bedeli jaqsy boldy. Eń sońynda biz Túrkelerıge qaı sportshyǵa tańdaýyńyz tústi dep suradyq. Ol jańaǵy tórt jigittiń esimin atady. Sóıtip, biz bedeldi mamannyń sózine toqtap, osy sportshylardy Londonǵa aparýdy jón kórdik.
Daıyndaǵan
Dastan KENJALIN,
«Egemen Qazaqstan».
